٦ مطاعم أرمنية شهية ببيروت

إذا بتحبوا الأكل الأرمني بس ما بتعرفوا وين فيكن تلاقوا الأفضل ببيروت، جربوا واحد من ليستة هالمطاعم المنتشرة بالمدينة:

١. سيزا

سيزا هوي واحد من المطاعم الأرمنية المفضلة عنا بكل لبنان. هالشي إلو عدة أسباب أكيد، ومنا قعدتو الدافية والحميمة. المطعم عبارة عن بيت قديم بمار مخايل وبقدم لضيوفو أشهى أطباق المطبخ الأرمني الأصيل المعدة بحب كبير. ضروري تجربوا لمانتي… والبيض بسجق كمان… شي بموت!

العنوان: مار ميخايل

٢. مياس

من قلب الأشرفية، المياس بقدم لضيوفو الوصفات الأرمنية التقليدية من سنة ١٩٩٦. تعوا مرة ورح تعيدوها كل مرة بسبب الأكل الشهي، الجو الحلو، حسن الضيافة والخدمة العالية. العثملية طيبة كتيرعندن وهي أحلا طريقة لتختمو وجبتكن اللذيذة هونيك.

العنوان: شارع تربود، الاشرفيه

٣. مايريغ

“إم الكل”! هوي بالجميزة وفيكن تدوقوا عندو أطيب الأكلات الأرمنية المحضرة عالمزبوط. بلش مؤخراً يقدم صواني غنية بعينات زغيرة من وصفات مختلفة حتى يكتشفوا زوارو يلي مش معودين عهالمطبخ أصناف جديدة ويحبوها. لما تروحوا، ما تفوتوا المعمول بالجبنة المسقا بالشراب العطري.

العنوان: مار ميخايل

٤. باتشينغ

الأكل عند باتشينغ طعمتو متل أكل البيت. تشاركوا التجربة الممتعة مع شريككن عالطاولة وكونوا مبسوطين. هون كمان ما تفوتوا المانتي، ولا كبب الكرز الطازا باللبن مع الخبز المقلي. المطعم بيعمل صفيحة بالجبنة والأعشاب خلا كتار يقصدوا بس كرمالا. أما الأربعا فهوي نهار مخصص للملوخية عند باتنشينغ، مع مكوناتو السحرية. من بين تجارب الطبخ العديدة بلبنان، هالمطعم عندو تجربة بتستحق كل الإعجاب والتقدير. مروا عمطعمو التاني بالجميزة، إسمو ماما، إذا كنتوا عم بتفتشوا عقعدة شوي خاصة أكتر.

العنوان: شارع قسيس، ضبيه

٥. بادغير

متخصص بأنواع النبيد الأرمني، كمان المانتي عندو طيبة كتير. طلبوا عين الغزال للتحلاية أو الفطاير بالطحينة. مهم نخبركن إنو كل خميس بادغير بقدم صيغة جاهزة، يعني ما فيكن تطلبوا شي من اللايحة العادية.

العنوان: شارع در ملكونيان, برج حمود

٦. فاروج

تجربة فريدة مننصحكن تخوضوها. دوقوا الأطباق يلي اشتهر فيا ويلي محضرة ورا باب المطبخ هون: شي ما بيتصدق! هوي إختصاصي بفخاد الضفادع بالمواسم الباردة.

العنوان: شارع مارشا رويال, برج حمود

ترجمة: رنا قاروط