أفضل ٨ سالاد بار بلبنان

بار السلطة هوي دايماً خيار رائع لما تكونوا حابين تاكلوا برا، ومش ضروري تكونوا عم تعملوا ريجيم.

بالنسبة إلنا، هول أفضل بارات للسلطة بلبنان، ومنحب نلفت نظركن انن مش محطوطين أبداً حسب الأهمية:

١. المندلون كافيه

بار السلطة بالمندلون بيفتح الساعة ١٢ الضهر. بقدم مكونات غنية، طازة ومعلبة، متل: الخضرا، التونا، البيض المسلوق، المكسرات النية، الزبيب والمعكرونة. جناح الخبز لطيف مع عدة أنواع مازا تحت الطلب. بفرع ضبية، جنينة التراس مكان مثالي لتستمتعوا بوجبتكن الصحية.

السعر: ٢٩،٥٠٠ ل.ل

العنوان الأول: شارع تشارلز مالك، أشرفيه

العنوان الثاني: اوتستراد ضبيه، ضبيه 

٢. باتشينغ

بيفتح كل يوم، البار بباتشينع بشهي وهوي مش بس للسلطات. قدامكن خيار واسع من الصحون التقليدية: منا أنواع السلطة المعروفة بالإضافة لكم صنف من اختصاص المحل وحدو. كل الأطباق خالية من مشتقات الحليب، اللحوم، السكر والطحين مع التركيز على استعمال الحبة الكاملة بكل الوصفات، الخضرا الطازا وزيت الزيتون النقي. ما تترددوا وجربوا الحراق أصبعو.

السعر: ٢٣،٠٠٠ ل.ل

العنوان: ١٢٧٥ شارع قسيس، ضبيه

٣. أوربانيستا

“بار الأكل” بأوربانيستا بيتجدد عطول بالإضافة لوجود مكونات ثابتة وأساسية. بميزو إنو كل شي عطول طازا ما عدا التونا، الصنف الوحيد المعلب، متل ما بيفتخروا وبقولوا القيمين على المحل. كَوّنوا السلطة الخاصة فيكن عذوقكن: جبنة الفيتا مع الشمام والجوز مثلاً، أو سلطة الدجاج مع كمية خس حرزانة، السبانخ والكيناوا الغنية بالببروتين.

السعر: ١٩،٥٠٠ ل.ل لتعبوا الصحن مرة وحدي و ٢٤،٥٠٠ ل.ل لتعبوا صحنكن عدة مرات

العنوان الأول: بناية ١٠٧٥٬ الطابق الأرضي، بيروت ديجيتال دستركت

العنوان الثاني: أول شارع بليس الحمرا 

العنوان الثالث: شارع جوراد، جميزه

العنوان الرابع: ABC أشرفيه، أشرفيه

العنوان الخامس: ABC ضبيه، الطريق العام ضبيه

٤. كاسبر أند غامبينيز

بيعرض كاسبر أند غامبينيز قدام ضيوفو الدجاج، التونا، البيض المسلوق، جبنة الفيتا، البروكولي، الصويا الخضرا، الكيناوا، أنواع الخس المختلفة… وللزينة عالوج: المكسرات النية والخبز الفرنجي المحمص. البار بقدم كمان أصناف المازا المحبوبة، متل الحمص، متبل الباتنجان، القرنبيط المقلي ومقالي تانية كمان، البطاطا المهروسة مع زيت الزيتون والمدردة. إذا طلع عبالكن شي وما كان متوفر عالبار (متل الأفوكا مثلاً)، فيكن تطلبوا عجنب.

السعر: ٢٧،٥٠٠ ل.ل

العنوان الأول: ABC أشرفيه، أشرفيه

العنوان الثاني: ABC ضبيه، الطريق العام ضبيه

العنوان الثالث: أسواق بيروت، وسط بيروت

العنوان الرابع: سنتر ديونس، فردان

العنوان الخامس: مستشفى الجامعة الأميركية، الحمرا

العنوان السادس: الطريق البحرية، دورة

٥. مطعم دويو

هوي كمان واحد من مطاعم سلطة البار المفضلة عنا. تشكيلة غنية من المكنونات الطازة وبنوعية ممتازة، متل: الدجاج المشوي، التونا، البيض، الجبنة، الأفوكا، الحبش، البطاطا المشوية وأنوع مختارة من الخضرا متل: البروكولي، الهليون والشمندر. في كمان عدة تتبيلات خفيفة فيكن تضيفوها عسلطتكن بدون ما تشعروا بأي ذنب مهما كان ريجيمكن قاسي. متل بأغلب المطاعم، إذا في صنف بدكن ياه وما لقيتوا، فيكن تطلبوا من الشخص يلي عم بقدملكن الخدمة.

السعر: ٢٦،٥٠٠ ل.ل

العنوان الأول: ABC أشرفيه، أشرفيه

العنوان الثاني: ABC ضبيه، الطريق العام ضبيه

٦. دي تي و سو

الأول بوسط بيروت والتاني بالأشرفية. هني متل بعض وعندن نفس اللايحة. فيكن تزوروا واحد منن وتشكلوا صحنكن من ضمن خيارات ما الا حدود.

السعر: ٢٨،٠٠٠ ل.ل

العنوان الأول: ساحة الشهداء، وسط بيروت

العنوان الثاني: إسباس ٢٠٠٠، كسليك

٧. مالولو

مالولو فتح بس من فترة قصيرة بالجميزة. هوي بوك بار ( عطريقة هوايا، مختص بسلطات السمك الني). شفنا ضروري نحطوا عهالليستا حتى لو كان مختلف شوي عنغيرو. بقدم التونا الطازة، السلطعون، السمك الأبيض والقريدس المسلوق. فيكن تضيفوا عوج المكونات يلي بتختاروها الرز، الكيناوا، الواكامي وإضافات تانية منوعة وغنية متل الصويا الخضرا والمطبوخة عالبخار، المانغا المنعشة، البصل الأخضر، حبوب الفستق وغيرا كمان!

السعر: ٢٠،٠٠٠ ل.ل لمكون واحد، حصة وحدي، إضافتين، نوعين من الزينة عوج الصحن، وتتبيلة. السعر كمان بيختلف حسب حجم الصحن يلي بتختاروا.

العنوان: شارع مار نيكولاس، أشرفيه

٨. لا بوتيت تابل

هون الأسعار كتير متكافئة مع شو بيتقدم عالسفرة، والأصناف بتتجدد كل يوم. الغنى ملفت: سلطات ملونة جاهزة، مجففات، قلوبات، خضرا مطبوخة عالبخار، معكرونة، بطاطا محضرة بطرق مختلفة، دجاج بالأعشاب وغيرا… مش رح تزهقوا أبداً: أصناف عمد العين والنظر وبتتبدل حسب المواسم.

السعر: ٢٨،٠٠٠ ل.ل ( + ٤،٠٠٠ لتصبوا شوربة أد ما بدكن، لما تكون متوفرة)

العنوان: جميزه الطريق العام

ترجمة: رنا قاروط