٨ أفلام لبنانية منفتخر فيها لازم الكل يحضرها

كل سنة بينزل أفلام لبنانية كتير، في منّن منستحي فيهن وفي منّن منفتخر فيهن. كرمال ما تتعزّبوا تفتّشو عن الأفضل بعالم السينما اللبنانية، جمعنالكن ياهن هون. ملاحظة: هول الأفلام هنّي يلّي نزلوا بالسينما لكافة العالم، في كتير كتير أفلام لبنانية قصيرة منفتخر فيها وبتربح جوائز عالميّة. ١- West Beirut (١٩٩٨) بيحكي قصّة عن الحرب الأهليّة ولمّا كانت بيروت مقسّمة دينيّاً. من خلال هالفيلم كل انسلن في يحسّ ببشاعة الحرب وكيف اتدمّر لبنان من وراها. إخراج: زياد دويري بطولة: رامي دويري ٢- Caramel (٢٠٠٧) فيلم بيحكي قصّة خمس نسوان ومنعيش معن تجربتن كل وحدة كيف أيامن ببيروت. إخراج: نادين لبكي بطولة: نادين لبكي ٣- Ghadi – غدي (٢٠١٣) غدي بيحكي قصّة عن ضيعة عم تحاول تدشّر ولد صغير لأن عم يزعجن بصريخو كل النهار والليل، فبيبنكر الأب خدعة ليخلّي الكل يحترم إبنو وبيكشف من خلالو الخبث والكذب يلّي عم بصير بالضيعة. إخراج: أمين ضرّة بطولة: جورج خبّاز ٤- Very Big Shot – فيلم كتير كبير (٢٠١٥) الفيلم بيتناول قضيّة أشخاص بتاجروا بالمخدّرات وكيف حاولوا يعملوا أكبر عمليّة لإلن من خلال تصوير فيلم كتير كبير والمشاكل يلي بواجهوا من ورا هالشّي. إخراج: مير جون بو شعيا بطولة: ألان سعادة ٥- Solitaire – محبس (٢٠١٦) الفيلم بيحكي قصّة عيلة سورية جايين يطلبوا إيد حبيبة ابنن بس بيكشفوا إنّو عيلة البنت اللبنانية متعصّبين وبيكرهوا السوريّين. فبصير أحداث مضحكة ومؤلمة بتعكس واقع كتير من العيلات اللبنانية. إخراج: صوفي بطرس بطولة: جوليا قصّار، علي الخليل، بسّام كوسى، نادين خوري ٦- Listen – اسمعي (٢٠١٧) قصّة عن مهندس صوت اسمو جود بيوقع بحب وحدي وبأضّوا وقت ممتع سوا لحدّيت ما يصير معها حادث وتغيب عن الوعي. جود بصير يحاول المستحيل لحتّا يحاول يساعدها تفيق. إخراج: فيليب عرقتنجي بطولة: هادي بو عيّاش ٧- The Insult (٢٠١٧) الفيلم اللبناني الأوّل يلّي بيترشّح لجوائز الأوسكار، بيحكي قصّة قضيّة بيرفعها مواطن لبنانب على عامل فلسطيني لأن ضربو. الفيلم بيحكي عن أكتر بكتيب من مجرّد قضيّة ضرب. بيتناول الفيلم قضايا ومعاني عن المعانات العربيّة، وعن ماضي لبنان والحرب والتسامح. لازم كل لبنانب يحضرو للفيلم. إخراج: زياد دويري بطولة: عادل كرم و كامل الباشا ٨- Still Burning – نار من نار (٢٠١٧) هيدا الفيلم مش لكل العالم. هيدا الفيلم حيستمتع في الأشخاص يلي بحبّو الأفلام يلّي قصتها ما كتير واضحة وبحاجة لتحليل عميق لتفهم بعض المعاني يلّي بيحملها الفيلم. الفيلم بيحكي عن مخرج التقى برفيق الطفولة من بعد ما عرض فيلمو بالصالات، ومن بعدها بتصير أحداث بتفهّمنا القصّة الأساسية للفيلم. إخراج: جورج هاشم بطولة: وجدي معوّض و فادي أبي سمرا