جبيل هل ويك-أند: سوق الزهور والمنتجات التقليدية (الدخول مجاني)
رح تتزين شوارع السوق العتيق بالورود هل ويك-أند بمناسبة حلول الربيع من خلال سوق الزهور والأشغال اليدويّة والمنتجات التقليديّة، لي رح يصير هل ويك-أند، مبلش السبت ٣٠ نيسان ورح يكفي للتلاتا ٣ أيار، من الساعة ١٢ الضهر حتى الساعة ١٠ بالليل، بجنينة السوق العتيق.
حزروا شو؟ الدخولية مجانية لكل حدا حابب يغير جو من دون ما يتكلف ويدفع شي!
سوق الزهور والأشغال اليدويّة والمنتجات التقليدية رح يزين شوارع السوق العتيق بالورد والياسمين والعطر والفن.
رح تلاقوا كل شي في زهور معباية المكان وكمان كل شي معمول من زهور متل مي الورد ومونة ورد ومعارض فنية وأشغال يدوية بالإضافة لمنتوجات يدوية ومونة بلدية متل العسل ودبس الخروب ونبيد لبناني وكشك وزعتر ومربى ومخللات.
لتكمل فرحتكن، كيف ما رح تبرموا رح تحسوا بسحر الأضواء وألوان الربيع والطقس الحلو وأكيد فيكن تاكلوا بهل أجواء بمطاعم السوق. او تبوردوا وتشربوا عصير فريش أو بوظة.
كونوا كتار وعملوا أحلى مشوار مع لي بتحبوهن على جبيل وغيروا جو!
