هالصفحة بتنشر نصايح الجيل القديم بلبنان!
تيتا دايماً عندها حل لكل مشكلة. عمّو اللي بتلتقي فيه بالدكانة بيعطيك نصايح بالحياة بتعلق براسك. بين الأحاديث اليومية واللقاءات اللي ما بتتوقعها، في نوع من الحكمة اللي ما بتلاقيها إلا عند الجيل القديم بلبنان.
Voices of Wisdom، رغم إنها صفحة جديدة، بس انتشرت بسرعة لأنّها بتنقل أحاديث حقيقية وصادقة مع الكبار و الختايرة بلبنان، بيشاركوا فيها نصايحهن وتجارب حياتن متل ما هي.
“هني عاشوها، وإنت بتتعلّم منها”
بواحد من الفيديوهات اللي انتشرت بشكل واسع، بيسأل المذيع ختيارة لبنانية عن الحب. وبين التعليقات المهضومة عن حياتها العاطفية، بتعطينا نصايح صريحة من تجربتها.
بتقول: “يلعن ديب هالحب…صعب كتير يا عمتو…جبنا ولاد… وهو الله يرحمه توفى… وحبينا…وهالحب راح، راح بالبحر، بالنهر.”
ورجل تاني عطى رأيه بنفس السؤال. حكى كيف مش كل زواج بيبلّش عن حب، وذكر تجربته مع الزواج التقليدي. بيقول، “حياة الحب حلوة كتير يا عمي. لبعيشا حلو كتير.”
آخر فيديو نزل هو لامرأة عمرها 53 وطالبة سنة أولى جامعة. بتقول: “إذا كبرنا بالعمر، هيدا ما بيمنع إنو بعدنا عم نحلم… نلحق الشغف يلي جواتنا، نلحق الشرقطة يلي بتخلي حياتنا مضوية أكتر وأحلى أكتر…نلحق الجنون يلي بيخلينا نتميز وبيخلينا نحس بنبض الحياة.”
Voices of Wisdom مبنيّة على لحظات حقيقية متل هيدي. هالأحاديث يلي بتوقف الوقت شوي شوي، وبتذكّرنا إنو الحكمة مش دايمًا بتجي من الكتب أو الخبراء. أوقات بتجي من أي حدا منصادفو بالشارع وبيترك أثر فينا.
تأكد من متابعتهن على إنستغرام لمزيد من النصايح المفيدة.
