لقينا ه مطاعم بزحلة مع قعدة بطير العقل

عروسة البقاع” زحلة” من أجمل المناطق اللبنانية، كيف ما وصفناها و شو ما قلنا بيبقى قليل على هالمدينة الروعة يلي منها انطلقت حضارة الكرمة والعرايش والأكل الطيب وفيها التقوا الأبطال. من بعد ما شفنا ٤ مطاعم بحراجل مع منظر بطير العقل، اليوم رح نكفي مشوارنا على زحلة لنخبركن شوي عن أرض الأبطال ونستكشف سوا المطاعم الموجودة بأحضان نهر البردوني والمطاعم لي قاعدة بقلب الطبيعة ونتعرف على مميزات كل محل.

١. بان إي فان Pain et Vin

الحيطان الحجر وأواني الزهور الحلوة أكيد رح تعجبكن بهل مطعم المميز، كل لقمة بيتزا وباستا رح تاخدكن على عالم تاني واللحظات بتقطع من دون ما تحسوا إنتو وقاعدين بهل محل، تأكدوا إنو تتركوا مساحة للحلو لأن الديسير عندن كتير بشهي.

الرقم: 333 822 08

٢. سيرينيتي Serenity

إذا بتحبوا الأكل اللبناني والعالمي والقعدة على التراس والمناظر الساحرة، هل محل رح ياخدكن بالحلم ويقدملكن أشهى الأطباق، القعدة عندو برا مثالية بين الزهور والأعشاب خرج كل مناسباتكن. المنظر من هل محل خيالي وبطل على كل زحلة من فوق، وأجمل شي منظر غروب الشمس من هل نقطة إنتو وعم تتلذذوا بأكلاتكن المفضلة.

الرقم: 005 910 03

٣. شي جيو جيو

هل محل بيعمل البيتزا الإيطالية على الأصول من كل المكونات الإيطالية المحضرة على الإيد. هالجوهرة المخفية بقدم بيتزا طازة ملياني وطيبة، مع طبقة صوص البندورة وفوقها أكتر من جبنة، ما رح تفهموا غير لدوقوا. أكيد إذا عبالكن قعدة خفيفة نضيفة بعيدة عن العجقة، شراشف حمر وبيض وجو إيطالي لذيذ، هل محل رح يخليكن تحسوا بهل شعور.

الرقم: 884 822 08

٤. ز برغر هاوس Z Burger House

بقلب شارع البردوني، قاعد هل محل المهضوم، البعض بيعتبروا أسطورة البرغر، لأن بيعمل أصناف برغر ما بتخطر على البال ولا على الخاطر وحتى ساندويشات غير شكل. ولاد الضيعة بيقصدوا هل محل من بيروت ليدوقوا الspécialité لي بيعملها لأن كريمة كتير وفيها مكونات وخلطات روعة. هل محل عندو كتير إختراعات بالبرغر بس الأطيب ال Biggy House Burger بدوبل لحمة وجبنة تشيدر مع صوص مميز لي فيكن تقسموها وتتشاركوها مع شخص بتحبوا! أما القعدة فلذيذة ومهضومة وعلى الستيل الأمركاني.

الرقم: 209 809 08

٥. كازينو عربي

قعدة كازينو عربي من أجمل القعدات على نهر البردوني، هل محل عمرو حوالي ال100 سنة وبقدم سفرة لبنانية أصيلة مع جلسة بين الخضار والشجر وعلى صوت المي. بس توصلوا على هل مطعم رح تحسوا حالكن فتتوا على مدينة بحد ذاتها، كل شي مميز من حفلة الصاج على الإستقبال لطريقة تقديم الأكل والضيافة والقهوة التركية بعد الأكل.

الرقم: 214 821 08