هيك أسعار سندويشات الستيك فريت عند أشهر المحلات بلبنان!

عبالكن تاكلوا الستيك فريت بس بلا شوكة وسكين؟ ولا يهمكن، فيكن تستمتعوا بهيدا الطبق الكلاسيكي على شكل سندويش! هون جمعنالكن أبرز المحلات بلبنان يلي بيقدموا ستيك فريت أو سندويش انتروكوت، مع الأسعار تبعن.

1. Skirt، وسط بيروت

السعر: $45

سندويش ستيك فريت بفخامة ما بتنوصف! باغيت 30 سم مليان ستيك طري، مغرق بصوص زبدة كريمية ولمسة كونياك بتعطيه نكهة ولا أروع. الطعمة خيالية، بس السعر غالي شوي – 45$ لسندويش! إذا حابين تجربة أرخص، عندكن خيارات تانية تحت.

2. Couqley، الجميزة وضبيه

السعر: $17

إذا كنتوا من عشاق طبق الستيك فريت، أكيد سامعين بكوكلي! وهلق فيكن تستمتعوا فيه على شكل سندويش لذيذ. بيجي مع سلطة جانبية ومشروب، بس انتبهوا، هيدا العرض متوفر بس بنص الجمعة قبل الـ 4 بعد الضهر!

3. L’Otre Entrecôte، أنطلياس

السندويش العادي: $14
النص سندويش: $8

خيار اقتصادي لمحبي الستيك! فيكن تختاروا بين السندويش العادي أو النص سندويش إذا ما كنتوا كتير جوعانين. محضرة من 100 غرام فيليه غريل طري، مع بطاطا مقلية مقرمشة، خس، وصوص أعشاب بيعطيها نكهة غير شكل. واذا بتحبوا تعدلوا على طلبكن، فيكن تاخدوها على شكل طبق وتزبطوها عكيفكن!

هيدا المحل بقدم كمان ستيك بالمرطبان، تعرفوا علي أكتر هون.

4. French Canteen، برمانا

السعر: 000 250 1 ل.ل.

سندويش الستيك عندن بينعمل على كيفكن! فيكن تختاروا الصوص اللي بتحبوها: بالأعشاب، بالفطر، أو بالفلفل، ومعها بطاطا مقرمشة وخس ع جنب. وأحلى طريقة للأكل؟ بتحشوا البطاطا جوات الساندويش، بتزيدوا شوية خس، وبتكبوا الصوص على الوجه… الطعمة بتصير خرافية!

5. باجيت بيسترو، مار مخايل

السعر: $12

هالجوهرة المخفية بمار مخايل معروفة بطبق الستيك والبطاطا! إذا بتحبوا بصحن أو بباغيت، هالمحل بيقدملكن الخيارين. السندويش مليان شرحات ستيك طرية بتدوب بالتم، مع بطاطا مقرمشة وصوص كريمية بتاخد الطعمة لمستوى تاني!

إذا عبالكن سندويش ستيك فريت، عندكن خيارات بتناسب كل ميزانية! أي واحد رح تجربوا أول شي؟

إذا عبالكن خيارات خفيفة على الجيبة، تأكدوا من زيارة قسم #خفيف-عالجيبة على موقعنا!