بجهود السفيرة هند درويش…قلعات جبل عامل ع لائحة التراث العالمي!

خبر حلو لكل لبنان وخاصةً جنوبه! قدرت الدبلوماسية اللبنانية هند درويش تحقّق إنجاز دولي مهم: إدراج 5 قلعات تاريخية من منطقة جبل عامل ع لائحة التراث العالمي التابعة لليونسكو.

خلال الدورة الـ48 للجنة التراث العالمي التابعة لليونسكو، يلي انعقدت بمدينة بوسان بكوريا الجنوبية، وافقت اللجنة على طلب لبنان لإدراج قلعة الشقيف ، قلعة تبنين، قلعة شقرا، قلعة دير كيفا، وقلعة شمع ع لائحة التراث العالمي، بالإضافة للائحة التراث العالمي المهدّد بالخطر.

هالقرار بيعترف بالقيمة التاريخية والاستثنائية لهالقلاع. كمان بيأمّنلها حماية ودعم دولي أكبر، بوقت بعدو التراث الثقافي اللبناني عم يواجه تهديدات جدّية نتيجة اعتداءات العدو.

وبصفتها سفيرة لبنان والمندوبة الدائمة لدى اليونسكو، كان لهند درويش دور محوري بحشد الدعم الدولي لملف الترشيح. قدرت تثبت إنو رغم كل التحديات، لبنان بعدو قادر يحقق إنجازات عالمية ويحافظ على تاريخه وهويته.

وبعد الإعلان، كتبت درويش بمقال نشرته صحيفة المدن إنو هالإنجاز ما كان نتيجة عمل شخص واحد. وقالت: “أجمل النجاحات هي يلي بتتحقق بالعمل الجماعي.”

ومن خلال المقال، وجّهت الشكر لوزارة الثقافة اللبنانية برئاسة الوزير غسان سلامة ومستشاره جاد تابت، وللمديرية العامة للآثار برئاسة سركيس خوري، على جهودهن بإنجاح ملف الترشيح. كمان شكرت المدير العام لليونسكو خالد العناني، وسفير لبنان لدى كوريا الجنوبية وائل هاشم. بإضافة لدبلوماسيين وخبراء التراث يلي اشتغلوا خلف الكواليس حتى يوصل هالملف لهالنتيجة.

وبيجي هالاعتراف بالتزامن مع قرار مهم تاني اتخذته اليونسكو بنفس الجلسة، وهو إدراج المواقع الأثرية بمدينة صور على لائحة التراث العالمي المهدّد بالخطر، بهدف تعزيز الجهود الدولية لحماية واحد من أهم المواقع التاريخية بلبنان.

وبهالمرحلة يلي عم يواجه فيها التراث اللبناني مخاطر كبيرة، بيحمل هالقرار رسالة أمل بأنو حماية تاريخ لبنان بعدها ممكنة، وبأنو في لبنانيين عم يشتغلوا بكل جدية على الساحة الدولية، متل السفيرة هند درويش، حتى يحافظوا على إرث البلد وينقلوه للأجيال الجاية.

شوفوا كمان:

رسمياً: مدينة صور القديمة ع لائحة التراث العالمي المهدّد بالخطر