شو مشاريعنا

جنينة بالأشرفية رح تتحوّل لسوق مفتوح بكرا! (الدخول مجاني)

إذا بعدكن عم تفتّشوا على نشاط حلو ومفيد تعملوه نهار الجمعة، حطّوا سوق الشباب المفتوح Open Youth Market على الليستا. هالفعالية من تنظيم مكتبة السبيل – جعيتاوي، وبتجمع بين دعم المشاريع المحلية، تشجيع روّاد الأعمال الشباب، وأجواء صيفية حلوة لكل العيلة.

جنينة اليسوعية: نشاطات حلوة، أسواق، وفن لكل الحي!

سوق الشباب المفتوح ناطركن نهار الجمعة 31 تموز بجنينة اليسوعية بالأشرفية، من 10 الصبح لحد 7 المسا، والدخول مجاني للكل.

طول النهار، فيكن تتعرّفوا على مجموعة كبيرة من المنتجات المحلية المصنوعة بإيد شباب وشابات لبنانيين، من مأكولات وحلويات، لأشغال يدوية، إكسسوارات، منتجات حرفية، وهدايا مميزة. وكمان رح يكون في مبادرات شبابية ومشاريع ناشئة من مختلف المجالات، لتسليط الضو على أفكار جديدة ودعم الإنتاج المحلي.

وإذا رايحين مع الولاد، في أنشطة ترفيهية مخصّصة لإلن حتى يستمتعوا ويقضّوا نهار حلو.

صاروا هالنوع من الفعاليات فرصة حقيقية لندعم أصحاب المشاريع الصغيرة ونكتشف أفكار ومنتجات جديدة. وإذا بتحبّوا الأسواق المفتوحة، والأجواء الصيفية، أو حتى بدكن تتمشّوا بقلب الأشرفية، أكيد هالفعالية بتستحق الزيارة. مرقوا، تعرّفوا على أصحاب المشاريع الشباب، واستمتعوا بالأجواء.