تعاون المصمم اللبناني سليم عزّام مع Cartier خطف الأنظار!

تعاونت Cartier مع المصمم اللبناني سليم عزّام لتصميم مجموعة قطع مصنوعة ع الإيد خصيصًا لمتجرها ببودروم. المجموعة بتجمع بين عالم Cartier الفاخر وفن التطريز اليدوي اللي تناقلته الأجيال على مدى مئات السنين.

وأكيد، فهد Cartier الشهير حاضر بهيدا التعاون كمان.

من أبرز القطع بالمجموعة تعليقة مطرّزة بالإيد، صمّمها سليم عزّام مع فريق من حرفيين خصيصًا لـ Cartier. ومن خلال غرز دقيق ومدروس، أخد نمر Cartier شكله بطريقة جديدة ومميزة.

لبنان بكل غرزة…

بالنسبة لسليم عزّام، التطريز مش مجرد تفصيل للزينة. هو تربّى بجبال الشوف، وكبر بين نسوان ضيعته وتقاليد التطريز اليدوي اللي كانت تنتقل من جيل لجيل.

أسّس علامته الخاصة سنة 2016 بهدف الحفاظ على هالحرف التقليدية ويزيد لمسة عصرية. واليوم، الـatelier تبعه بيشتغل مع أكتر من 60 مطرّز وحرفي من مختلف المناطق بلبنان، وبيشارك بشكل مستمر بفعاليات الموضة والتصميم بالمنطقة.

يعني رغم إن هالمشروع موجود ببودروم، روح لبنان موجودة بكل غرزة.

تجربة تطريز من بودروم

المجموعة بتضم كمان علبة تطريز حصرية صمّمها عزّام بالتعاون مع Cartier، وانعملت خصيصًا لمتجر العلامة ببودروم. الزوار فيهن يستخدموا العلبة ويجرّبوا التطريز بنفسهن، ويعيشوا تجربة هادية وبطيئة بتخلّيهن يكتشفوا هالحرفة التقليدية بطريقة شخصية وتفاعلية.

التعاون بين Cartier وسليم عزّام مش بس عن الفخامة. Cartier جابت معها التراث والاسم، بينما عزّام والحرفيين معه جابوا الحرفة والشغل اليدوي، والنتيجة مجموعة بتجمع العالمين غرزة ورا غرزة.

شوفوا كمان:

شو قصة قصر دونا ماريا سرسق بصوفر؟