إطلاق حملة «مليون كتاب للبنان» لإعادة بناء المكتبات المتضررة

شبكة تليد الوطنية لحماية المكتبات والأرشيف والإرث الثقافي بلبنان أطلقت حملة وطنية لجمع مليون كتاب. هدفها إعادة بناء المكتبات اللي تضرّرت من الاعتداءات، وإرجاع الكتب للمجتمعات اللي خسرت مكتباتها.

الحملة بتنطلق رسميًا نهار الخميس 17 أيلول الساعة 5 المسا من المكتبة الوطنية في بعقلين، لتبلّش من الشوف وتنتشر بعدها بمختلف المناطق اللبنانية. الدعوة مفتوحة للكل، من دور النشر والمكتبات والجامعات والمدارس والبلديات والجمعيات، وصولًا للأفراد اللي بيآمنوا إنو الكتاب جزء أساسي من ذاكرتنا وحياتنا اليومية، وإنو المعرفة حق للكل.

وفيكن تساهموا بالحملة بأكتر من طريقة: من خلال التبرّع بالكتب، نشر الحملة، أو تشجيع غيركن على المشاركة.

كيف فيكن تتبرعوا؟

عم تنقبل التبرّعات بالكتب عند Barzakh بالحمرا، كجزء من الحملة. إذا حابّين تساهموا، فيكن تتواصلوا معن عبر الرسائل الخاصة على السوشيال ميديا.

أما إذا حابّين تساهموا ب”حملة مليون كتاب” تحديدًا بمنطقة الشوف، فيكن تتواصلوا مع المكتبة الوطنية – بعقلين على الرقم: 415 522 03.

مبادرات متل هيدي بتذكّرنا أديه الكتب والمكتبات جزء أساسي من مجتمعاتنا، وأديه فينا نساعد بإرجاع هالمساحات للحياة، كتاب بعد كتاب.