سهرة فيها 12 فنان لبناني لدعم مساحة ثقافية جديدة بالحمرا

زمان، كانت الحمرا من أهم المناطق الثقافية و الفكرية ببيروت. واليوم، في مشروع جديد عم يشتغل ليعيد هالروح للمنطقة من خلال مساحة ثقافية مفتوحة للفنانين و المجتمع.

بـ6 تشرين الأول، رح يجتمعوا «عالمريخ» مع 12 فنان لبناني بليلة خاصة على مسرح المدينة. هالشي بهدف جمع التبرعات لدعم ترميم وتجهيز فضاء المدينة، المساحة الثقافية الجديدة اللي عم تنبنى بالمكان.

المشاركة بهيدي الليلة رح تجمع ماريو باسيل، نور حجار، جورج طويل، منال ملات، ساندي مطر، مي سحاب، آية أبي حيدر، طارق تميم، مريم شومان، راندا مخول، دي جي جود، ودبكة موليتين.

السهرة رح تكون مليانة عروض مباشرة، ستاند أب كوميدي، موسيقى، رقص، أكل، مشروبات ومفاجآت.

شو هو فضاء المدينة؟

تحت إدارة FADA: مؤسسة الفنون الدرامية العربية، عم يتأسس فضاء المدينة ليكون مساحة ثقافية بتجمع الفنانين و بتعطيهن مكان يشتغلوا، يجرّبوا أفكار جديدة، يتعاونوا و يشاركوا أعمالهن مع الناس.

الفكرة هي إنشاء مساحة احترافية، بس بنفس الوقت تكون مفتوحة للفنانين الجدد و المحترفين. وكمان تضيف مكان جديد للمسرح والفنون و التبادل الثقافي ببيروت.

المساحة رح تضم قاعة مسرح مجهزة بالكامل بتساع لـ110 أشخاص. رح تكون مساحة للورش و البروفات، تجهيزات للإنتاج، مساحات لعرض أعمال الفنانين و الحرفيين المحليين، مكاتب، 3 غرف تبديل ملابس للفنانين، وكافيه ومنطقة للتجمع.

أكتر من مسرح

فضاء المدينة مش بس للمسرح. البرنامج رح يشمل مسرح، مسرح أطفال، رقص، موسيقى حية، ورش عمل، تدريبات، أنشطة تعليمية، نقاشات ثقافية، قصص، معارض، أفلام وتجمعات مجتمعية.

وكمان، رح تكون المساحة متاحة لفنانين مستقلين، خريجين جدد، مشاريع مجتمعية و أعمال مسرحية تجريبية، من خلال نظام إيجار بأسعار مقبولة. وبالإضافة للمشاريع والعروض الخارجية، فريق فضاء المدينة ناوي يقدّم إنتاجات خاصة فيه وبرامج موجهة للمجتمع.

ادعموا فضاء المدينة بـ6 تشرين الأول

حفل «عالمريخ» هو فرصة لتدعموا هالمشروع وتقضوا سهرة مع مجموعة من الفنانين اللبنانيين.

الحفل رح يصير بـ6 تشرين الأول 2026 على مسرح المدينة بالحمرا، بيروت، ضمن حملة لجمع التبرعات للمشروع. هدفه يكون مساحة ثقافية مستقلة، مستدامة ومفتوحة للناس.

إذا حابين تحضروا وتساهموا بدعم فضاء المدينة، فيكن تشتروا تذاكر من Antoine Ticketing، أو تتبرعوا مباشرة للحملة على GoFundMe.