بيت تراثي عمره 100 سنة فتح أبوابه للناس ببيروت

بمبنى عمره أكتر من 100 سنة، عم ترجع ذاكرة بيروت الثقافية و الحضارية تنفتح من جديد. من قلب زقاق البلاط، عم تفتتح جمعيّة المقاصد الخيريّة الإسلاميّة في بيروت «بيت المقاصد»، بعد ترميم المبنى و المحافظة على تفاصيله وهويّته المعمارية.

الافتتاح رح يكون نهار الإثنين 28 أيلول الساعة 5 المسا. بيهدف المشروع للحفاظ على تاريخ المقاصد وإرثها، وبنفس الوقت تحويل هالمكان لمساحة مفتوحة للأجيال الجديدة و الباحثين وكل حدا مهتم بالثقافة و التاريخ.

المبنى يعتبر من الأبنية التراثية ببيروت. خضع لعملية ترميم دقيقة للحفاظ على طابعه الأصلي، مع تجهيزه ليصير مساحة بتجمع بين الثقافة والفن والمعرفة.

شو رح تلاقوا ب «بيت المقاصد»؟

المكان رح يضم مركز للمعارض، مكتبة، ومنصّة ثقافية، ورح يستضيف معارض ومجموعات من الوثائق والمقتنيات المرتبطة بتاريخ المقاصد وبيروت. كمان، رح يكون في فعاليات فكرية وثقافية بتفتح المجال للنقاش والتفاعل وتبادل المعرفة.

وبحسب رئيسة جمعية المقاصد، الأستاذة ديانا طبّارة، بيشكّل بيت المقاصد جسر بين إرث الجمعية ومستقبلها. بيحوّل الذاكرة من تاريخ محفوظ لمساحة حيّة للمعرفة والثقافة والإبداع. 

المشروع كمان بيشكّل خطوة للحفاظ على جزء من هوية بيروت المعمارية. هالشي خاصةً بوقت عم تختفي فيه كتير من الأبنية القديمة أو تتغيّر ملامحها.

من خلال بيت المقاصد، الهدف مش بس الحفاظ ع مبنى قديم. كمان نعطيه حياة جديدة ومساحة بتضل مفتوحة للناس، للثقافة، وللقصص اللي شكّلت جزء من تاريخ وهوية بيروت.

شوفوا كمان:

معرض بيروت العربي الدولي للكتاب راجع قريباً!