٨ أماكن بتعمل لقمة طيبة بأسعار مقبولة ببيروت

كلنا عارفين كيف الأوضاع وكلنا عايشينها. كل شي غلي ومنها المطاعم والأكل من برا. لهيك جمعنالكن أماكن بعدها اسعارها مقبولة. وانتو خبرونا شو بتعرفوا محلات كمان!

١. Graze، زقاق البلاط

هيدا المطعم بيعمل أطيب برغر وبوصلها على باب بيتكن. إنشهر كتير بأكله الروعة وأسعاره الأروع. Graze ما عندهن قعدة، بس ديليفري.

٢. Lettuce Meat، الحمرا

للناس يلي بتحب التفنن بالأكل، هيدا المطعم ممتاز الكن. بيعمل برغر مع تشيبز التشيتوز الحر. ما فينا نوصفلكن اديه غير شكل! والأهم من هيك إنو أسعارن بعدها جداً مقبولة ومناسبة.

٣. سناك حمودي، زقاق البلاط

يلي ما بيعرف حمودي، ما بيعرف شي. مين فينا ما مجرب برجر الاسكالوب عند حمودي؟ إسطورة! وإذا بعدكن ما جربتها، هاي فرصتكن. حمودي من تاريخ شوارع بيروت، لهيك اسعاره بعدها ضمن المعقول.

٤. كلاسيك ساندويش، برج ابي حيدر

إذا كنتوا بالبيت ولا بالشغل ولا عنده أصحابكن وبدكن لقمة طيبة وسريعة، ما الكن غير كلاسيك سندويش. كلنا تعودنا عليه من لما فتح وحبينا سندويشاته ووجباته. وهلأ بالرغم من الغلاء الفاحش برا، بعدها اسعاره مقبولة.

٥. ميني جيت، كذا فرع

ميني جيت إنشهر بأكله الطيب والمتنوع. عنده شي بيرضي الكل وبعده عم بوسع المينو! ومع ذلك بعدها اسعاره منيحة.

٦. أبو عفيف، حمرا

أسطورة ثانية بشوارع الحمراء، أبو عفيف والبرغر عنده قصة! بعدها الأسعار عنده ضمن المعقول، والأهم مين هيك إنو إذا أكلتوا عنده بتكونوا عم تدعموا مصلحة عائلية.

٧. بربر، سبيرز

ما بتكمل السهرات بلا بربر. ومع إنو هلأ محرومين السهرات، مش يعني لازم نحرم حالنا من بربر كمان. أطيب تشيكن ساب وشاورما من غير عالم، وكل شي باسعار مقبولة.

٨. فلافل كريم صهيون، حمرا

ما فينا نحكي عن وجبات طيبة ورخيصة بلا ما نفكر بالفلافل. ومين ملك الفلافل غير كريم صهيون؟

وانتو، شو أطيب أماكن باسعار مناسبة عم تجربوها؟