تعرفوا معنا على بيت عليا… شو قصة هل بيت الخيالي المخبى بين الشجر والطبيعة الحلوة؟
“ع هدير البوسطة لكانت ناقلتنا من ضيعة حملايا لضيعة تنورين، تذكرتك يا عليا وتذكرت عيونك، يخرب بيت عيونك يا عليا شو حلوين…”
عبالكن تعيشوا هل غنية؟ إذا مش عاملين شي مشوا معنا على الشمال وتحديداً على تاني أكبر ضيعة بلبنان تنورين الجوهرة بطبيعتها وأحراجها لنكتشف هل كوخ الخشب المخبى بين الشجر والطبيعة الحلوة.
البيت يلي حابين نعرفكن علي اليوم إسمو بيت عليا نايم بقلب تنورين متل الغنية لي ما بتطلع من البال، وهونيك رح تلاقوا أكواخ خشبية مميزة وحلوة لازم تزوروها.
بيت عليا قاعد بالطبيعة بين الجبال والخضار والرواق وبطل على أجمل المناظر لي بتخطف القلب.
بوابة خشب مخباية بين الشجر والنسيم العليل رح توديكن على بيت عليا.
بيت عليا مألف من كوخين خشب، الكوخ الأول بيتمتع بجنينة كتير حلوة والكوخ التاني بيتميز بقعدة جنينة وبيسين بين الخضار والشجر وجو تقليدي. بتلاقوا كمان مطبخ ومحل للشوي وأوضة نوم وأوضة قعود ومرجوحة على الباب وقعدة بتاخد العقل.
المسا بتعملوا سهرة بالجنينة والصبح بتفيقوا على صوت العصافير والشجر وفنجان القهوة بهيك قعدة عنجد بترد الروح.
أما بالشتوية، القعدة جوا بالكوخ الخشب تجربة عنجد خيالية. بتشوفوا التلج مغطي الأراضي والشجر وبتحضروا الشتي إنتو ومكنكنين.
إذا كنتوا جايين على تنورين وحابين تكتشفوا معالمها السياحية، احجزوا ليلة ببيت عليا وقضوا عطلة من العمر.
قضوا أحلى سهرية على ضو القمر بالجنينة وخلو الحنين ياخدكن على عالم خيالي بعيد عن المشاكل والهموم والحزن وخلوا نظركن يسرح صوب هيبة الجبال المجيدة واستمتعوا بأطيب لقمة تحت النجوم!
قدام هل جنينة والقعدة الخيالية بتوقف لغة الكلام لتفتح الروح على لغة القلب تحت النجوم مع لقمة طيبة وموسيقى وصوت الحبيب ولحظات رومانسية لتنسج ضحكة صادقة وذكريات.
أما الأسعار فهي على الشكل التالي:
الBungalow الأولي مع جنينة وقعدة مهضومة بنص الجمعة والويك-أند ب80$ لشخصين
الBungalow التانية مع جنينة وقعدة مهضومة وبيسين بنص الجمعة والويك-أند ب100$ لشخصين
إشتهيتوا على هيك قعدة؟ لازم ضبوا الشنطة وتعملوا مشوار على تنورين لتكتشفوا هل ضيعة المميزة.
للحجز اتصلوا على: 107 708 70
شوفوا كمان: ببشري: بيت ضيافة و منظر ساحر بقلب بشري.
