بيت ستّ الكل: سفرة مليانة وموسيقى وفن بحمانا
مشوا معنا على ضيعة حمّانا الأصيلة، منطقة مشهورة بجمالها الساحر وطبيعتها الخلابة وشوارعها العتيقة، هيدا عداً عن كونها مساحة ثقافية مميزة بتجذب فنانين وموسيقيين كتار بمهرجاناتها الحلوة. اليوم رح نبلش مشوارنا بحمانا بواحد من أقدم الأوتيلات بالمنطقة “حمانا بلازا”، ورح ناكل لقمة طيبة ما فيه منها من عند بيت ستّ الكل، مطعم بقدم منيو مميز وجو ثقافي وفنّي روعة. كفوا معنا لتعرفوا اكتر.
بتبلش قصته هالمطعم مع إمّ انشهرت بالضيعة بأطباقها اللذيذة، وكرمال تتخلّد ذكراها بعد ما رحلت عن الدنيا، طلعوا ولادها بفكرة مطعم بيت ستّ الكل ليحافظوا على وصفاتها الطيبة والمميزة. القعدة لطيفة والطعمة غير شكل مع جو كتير حلو بقلب حمانا.
بقدملكن هالمطعم منيو مشكل من أطباق مختلفة ومقدمة بكل أصول. فيكن تبلشوا نهاركن الحلو بحمانا بترويقة بتعقد من عندن، بتلاقوا ترويقة لبنة وبيض وجبنة ومكدوس لشي خفيف على الصبح. وكمان فيه مناقيش بطعمات لبنانية شهية وغيرها معمولة على الصاج، بتطلع المنقوشة سخنة وطازة على ذوقكن! قعدة كتير لزيزة مع كاسة شاي دافية بتحليلكن نهاركن.
وبحال ميّلتوا على وقت الغدا، بيت ست الكل بيستقبلكن بكل شي بيخطر عبالكن، لبناني أو غيره. بتطلبوا سفرة مشاوي مشكّلة ومعمولة على القد، جنبها صحون من التبولة2، مقدمة على طاولة مليانة بمختلف أطباق المازة الباردة والسخنة، من الحمص والكبة والبطاطا الحرة لرقاقات الجبنة والمقانق وورق العنب وغيره، منظر بيفتح النفس على الآخر!
وإذا انتو من محبي الدجاج كتير رح يعجبكن الأكل، بتلاقوا أشهى سندويشات طاووق مليانة توم وكبيس وبطاطا مقلية، أو بتطلبوا فروج على الفحم منظره بشهي وطعمته ما في أطيب منها!
فوق انه بيت ستّ الكل بقدم أكل روعة بحمانا، كمان يعتبر مساحة فنية وثقافية بإمتياز. عنده قعدة مودرن ورايقة وديكور كتير حلو، بزواياه مصفوفة الكتب العربية والأجنبية لمحبي القراءة. وبينعمل بهالمطرح عروض فنية وموسيقية لايف متنوعة لكل حدن عنده شغف بالفن.
للحجز أو المزيد من المعلومات، فيكن تتصلوا على الرقم: ٨١٠٧٦٨٨٩
شوفوا كمان، ٧ مطاعم روعة مع ديكور ساحر بلبنان
