أجمل ٥ مطاعم مع إطلالة عالجبل

بقولو أحلى دوا شم الهوا، مين عبالو مشوار على الجبل، نتغدا ونتفرج على المناظر الساحرة سوا؟ مشوا ناخدكن كزدورة على أجمل 5 مطاعم حول لبنان بإطلالة على الجبل والوادي.

1. مطعم هوا جرجوع – جرجوع

ضيعة جرجوع من أجمل الضيع الجنوبية من ناحية المناظر الجبلية، وبتلاقوا بأحضان جبال هالمنطقة مطعم هوا جرجوع، لي بيقدم سفرة لبنانية مميزة من أطيب المازات التقليدية والمشاوي المشكلة، وبيتميز بإطلالة خيالية للجبال والوديان المغطاية بالخضار والشجر العالي.

الرقم: 409 809 70

2. بيت الجبل – دير القمر

مشوارنا على ضيعة دير القمر ما بيكمل من دون ما نجرب واحد من أجمل وأطيب مطاعم المنطقة، بتلاقوا عند ببيت الجبل ناطرتكن قعدة الأحلام بين الجبال، هالمطعم بياخدكن رحلة على عالم ساحر ورومانسي من أزغر تفاصيلو لقعدات جنيناتو تحت الشجر وبين نسمات الهوا، بتقعدوا على التراس، بتجربوا أطيب الأطباق اللبنانية، بوفيهات وطبخات تقليدية، بيتزا على الحطب- كل هيدا انتو وعم تسرحوا بالإطلالة الجبلية اللي بترد الروح.

الرقم: 767 160 71

3. مطعم تلة نصر – بكفيا

عبالكن قعدة مغمورة بشجر الصنوبر العتيق بين الجبال الشامخة؟ مطعم تلة نصر جوهرة من جواهر ضيعة بكفيا، بيقدم سفرة لبنانية كريمة وعلى أصولها، بتجربوا الفتوش، المازة السخنة والشهية، ولحمة نية بتاخد العقل، وبتسرحوا بجمال جبال بكفيا ووديانها.

الرقم: 549 983 04

4. مطعم قصر فخر الدين – برمانا

هالمطعم قاعد بقلب قصر تراثي بيستقبلكن على الأكل اللبناني من أكتر من ٤٠ سنة، بيتميز بأسلوب العمارة الشرقية الفاخر من قناطر عالية وحجر الصخر، وكمان بالقعدة الملوكية بين الورد والجبل. فيكن تجربوا أطيب المازات اللبنانية هني والولاد عم يلعبوا برا- مطعم مميز لجو العيلة والجمعات الكبيرة.

الرقم: 387 961 04

5. مطعم مطل الوديان – حرار

مطل الوديان اسمو على مسمى بمنطقة حرار، عندو سفرة مليانة أكل لبناني متنوع وبجودة ممتازة، بتقعدوا عندو وبتحسوا حالكن قاعدين على حفّة الوادي وقدامكن منظر من الخيال للجبال والطبيعة الساحرة جمال- بيحبس النفس وبيشبع النظر!

الرقم: 487 713 03

.شوفوا كمان، أطيب ٧ مطاعم لازم تجربوها بمدينة صور