مخيم سكون: قعدة مميزة بالطبيعة وغروب شمس ساحر

بلشت الصيفية يعني بلش موسم التخييم! ولكل محبي تجربة التخييم بالطبيعة، لقينالكن مخيّم مميز بمنطقة بمهرية بأحضان الشوف اسمو مخيّم سكون جاهز يستقبلكن على قعدة مميزة بقلب الطبيعة.

هالمخيم بعيد بس 500 متر عن محمية أرز الشوف، يعني تمشاية زغيرة وبتوصلوا على أكبر محمية للأرز بلبنان، وبعدها بتجربوا دروب المشي الحلوة، بتتفرجوا على الطبيعة، بتاخدوا أحلى الصور، وبتكتشفوا الغابة على راحتكن.

_{الصور مأخوذة من sko9n على الإنستغرام.}

بتلاقوا بالمخيّم قعدة جبلية بتاخد العقل ومخباية عن العالم بين الشجر الشامخ والصخر العالي، يعني تخايلوا حالكن نايمين بالخيمة ووعيتوا الصبح على واحد من أجمل المناظر الجبلية؟

بتعملوا فنجان قهوة مميزة وبتمزمزوا فيه مع رفقاتكن بقلب الطبيعة وعلى صوت العصافير، شي بيرد الروح!

القعدة مطلّة على الوادي والغابة، بتقدروا ترخوها على المراجيح وتنسوا حالكن بالهويات الحلوين، أو تعملوا سهرات نار وأطيب المشاوي مع أصحابكن تحت النجوم وضو القمر، وبتسحب معكن السهرة لطلوع الضو!

من اكتر الأشيا المميزة بالمخيّم هي إطلالتو على غروب الشمس، بيسرح نظركن بألوان دافية وساحرة مع منظر الجبال وشجر الصنوبر، أبداً ما بيتفوت!

كمان بتلاقوا فان زغير كتير مهضوم بتقدروا تناموا فيه بدل الخيم، وكل شي ممكن تحتاجو مأمّن! قعدة حلوة ومريحة لكل عشاق الطبيعة التخييم، خصوصي بهل طقس المشوب أحلى شي الطلعة على الجبل، بس ما تنسوا الجاكيت لأنو ممكن تبرد شوي بالليل.

شو ناطرين! أحلى تجربة تخييم بالشوف عند سكون!

للمزيد من المعلومات أو للحجز، اتصلوا على 620 131 79

شوفوا كمان، أحلى مشوار بالريف بهل٧ مطارح حول لبنان

تعرفوا على أجمل المشاوير بالطبيعة هون!