لقينا ٣ مطاعم بعاليه مع قعدة بتطير العقل

عاليه من أجمل المناطق بلبنان، قاعدة بالجبل وتعتبر عروس المصايف، بتفوح منها ريحة الشجر المعتق وبتتميز بشلالاتها الناصعة البياض، الأسواق القديمة، البيوت التراثية، المطاعم والمنتزهات والملاهي، وتعتبر من أهم المناطق الجبلية وأهم مراكز الإصطياف. لهيك، تعرفوا معنا اليوم على أهم مطاعم بعاليه مع قعدة بتطير العقل.

١. ع هواك

ما في أجمل من القعدة بأحضان الطبيعة على نهر عاليه، مطرح ما رح تشموا ريحة الأرض والشجر. ع هواك قاعد فوق النهر وبيقدملكن أطيب سفرة لبنانية أصيلة مألفة من أطباق المازة اللبنانية لي بتشتهوها مع ضيافة بعد الغدا وشوية فواكة. القعدة بالصيفية بتكون برا على النهر دغري، أما بالشتوية فعندن صالة شتوية مميزة بتطل على النهر والجبال ودافية خرج كنكنة. عندن كمان شاليهات مهضومة للأجار مع مناظر خلابة للنهر، ومطعم على ضفة النهر وحديقة للحيوانات، متنزه زراعي، والكتير من الأنشطة متل الكاياك والتخييم وغيرهن كمان.

الرقم: 970 650 81

٢. كرم جدودنا

هالمطعم عندو قعدة جبلية تراثية مهضومة ومريحة، بقدملكن أطباق المازة اللبنانية الشهية مع خدمة مميزة وجو حلو وموسيقى عربية. بيقصدوا للغدوات العائلية الكبيرة، أجواء جدودنا بتفتح الشهية للأكل مع القرايب والأحباب والأصحاب وسط قعدة جبلية من العمر _ تمتعوا عندو بأطباق مطبخنا اللبناني المحضرة عالطريقة البيتوتية الأصيلة!

^{credit: Nadem Hejase}

الرقم: 066 988 03

٣. مطعم السلطان

مين ما بيحب القعدة بالجبل مع هوايات عاليه ومنظر بياخد العقل قبال الجبال و الوديان و الطبيعة المباركة؟ هيك القعدة بهل محل بإختصار. هل مطعم متخصص بالمطبخ اللبناني العريق وبقدم مازة كريمة وأطباق مميزة محضرة بفن على الطريقة البيتية، أكيد رح تجربوا أطيب المأكولات البلدية و الطبخات اللبنانية مع شفة قهوة بعد الغدا: جلسة من العمر.

^{credit: Adel Abou Jaoude}

الرقم: 525 598 03

خبرونا بالتعليقات، شو مجربين بعد مطاعم بعاليه وحابين تشاركوها معنا؟

شوفوا كمان، لقينا ٥ مطاعم بالباروك مع قعدة بتطير العقل.