تعطلّ عبّارة بيروت-البترون السياحية… والركّاب رجعوا بالسيارات!

شهدت خدمة العبّارة السياحية Cedar Waves أول مشكلة إلها بعد أيام قليلة من انطلاقها، بعد ما تعرّضت لعطل تقني بمرفأ البترون. وهالشي أدّى لإلغاء رحلة الرجعة ع بيروت، واضطرّ الركّاب يرجعوا عبر البرّ بالسيارات.

وبحسب المعلومات المتداولة عبر Batroun Times، وصلت العبّارة بشكل طبيعي من خليج الزيتونة ع مينا البترون وعلى متنها عدد من الركّاب. بس بعد وصولها، تبيّن إنو في عطل بالمحرّك، وما قدرت تكفّي رحلة الرجعة ع بيروت.

الركّاب انتظروا لفترة طويلة بالمينا  قبل ما يتم إبلاغهن إنو العبّارة ما رح تبحر بهيدا النهار. وهالشي خلّى الركّاب يضطرّوا يرجعوا بالسيارات، بعد يوم كان مفروض يختتم برحلة بحرية مريحة.

وكانت شركة Cedar Waves بلّشت هالخدمة الجديدة من السبت 19 تموز، مع رحلات كل سبت وأحد بين بيروت والبترون. العبّارة بتنطلق من بيروت الساعة 10 الصبح وبتوصل ع البترون حوالي الساعة 11، أما رحلة الرجعة فبتكون الساعة 6 المسا وبتوصل ع بيروت حوالي الساعة 7.

هالخدمة انطلقت لتكون بديل سياحي عن عجقة السير، وتعطي الناس فرصة يستمتعوا برحلة بحرية ويقضّوا نهار بالبترون. وسعر التذكرة هو 20$ للاتجاه الواحد، أو 40$ للذهاب والإياب.

ورغم إنو الأعطال التقنية ممكن تصير بأي وسيلة نقل، إلا إنو هالحادثة بتعتبر أول اختبار فعلي للخدمة الجديدة. وثقة الركّاب رح تعتمد على الالتزام بالمواعيد، والسلامة، والجاهزية التقنية. وهلّق الأنظار رح تكون على كيفية ضمان إنو الرحلات الجاية تمشي بشكل طبيعي، خاصةً بموسم الصيف.

شوفوا كمان:

رسمياً، رحلات العبّارة بين بيروت والبترون بتنطلق هالويك-اند!