مشوار تراثي عند عمو أمين، من أقدم لحامين بلدنا!

ما في أطيب من اللحمة النيّة على قلب اللبناني! من الكفتة النية، الكبة النية، الفراكة والملسة الجنوبية، السودة النية، وغيرن من الأطباق التراثية اللي تخصصت فيها كل منطقة بلبنان وبتقدمها على طريقتها الخاصة. اللحمة النية غير شكل وصرلنا أكتر من 200 سنة مناكلها بلبنان، فكيف إذا كانت من ديات عمو أمين، واحد من أقدم اللحامين ببلدنا كلو، خلونا نعرفكن عليه!

اللحام اللبناني عمو أمين بيقدم أطيب لحمة ببيروت، عندو أكتر من 80 سنة خبرة بالمصلحة، عم تتخايلوا؟ العم أمين عمرو أكتر من 90 سنة وكان من زمان فاتح ملحمته بمنطقة ضهور شوير، وفيكن تمرقوا صوبو هلق ب”ملحمة القيامة” بمنطقة الجميزة. أول ما تدخلو عند هالملحمة بتشموا ريحة اللحمة الطازة والبهارات الطيبة. بيعمل اللحمة بكل حب، محافظ على التراث اللبناني، ومحلو دغري بيفوت على القلب. بتميلوا لعندو، بيدوقكن اللحمة النية، وما بتملّوا من أحاديثو المهضومة، وضحكتو الحلوة، ونفسو الطيب على الأكل.

الفولغر بيان راح على الجميزة عند عمو أمين وداق الكفتة النية المتبّلة ومبهرة على طريقتو! وبالفيديو بخبرنا اللحام عن اللحمة النية وتاريخها اللبناني العريق. وانتو خبرونا، بتجربوا كمان اللحمة عند عمو أمين؟

إذا حبيتوا مشوارنا الزغير ببيروت، خبرونا بالتعليقات! وما تنسوا تعملوا تاغ ل يلي بيضل ساعة عند اللحام!

شوفوا كمان، تعرفوا على كافيه Vernice الفني: ورشات رسم ولقمة طيبة ببيروت