شو قصة النملية يلي بتلاقوها بكل بيت ضيعة بلبنان؟

شو قصة النملية يلي بتلاقوها بكل بيت ضيعة بلبنان؟

بتتذكروا إيام زمان، وقت كانوا يحطوا الأكل والمونة برات البراد؟ اليوم رح نحكيلكن عن شي كتير مهضوم كان يستعملوا جدودنا إيام زمان لحفظ الأكل بالضيع: النملية.

النملية عبارة عن خزانة خشب موجودة بكل بيت لبناني عتيق، بتشبه خزانة التياب بس أزغر شوي. كانوا يستعملوها من زمان متل البراد لتحفظ الأكل من شمس الصيف وحتى من الحشرات.

^{Credits: Elaf}

ليش إسمها نملية؟

إسمها غريب شوي صح؟ السبب بسيط، كانت مسكرة كتير وما بتقدر ولا حشرة تفوت عليها، وخصوصي النمل الزغير ما كان يقدر يوصلها ولا يوصل للمونة المخزنة جاتها فلهيك سموها نملية.

بعد اختراع التلاجات والبرادات، اختفت النملية تقريباً من البيوت اللبنانية. بس مع انقطاع الكهربا اللي صار بالفترة الأخيرة، البعض بالضيع رجعوا يستعملوا النملية من جديد. وشو السبب؟

^{Credits: Charqouna}

النملية ما بتحتاج كهربا لتحفظ الأكل! متل الفخار، بتحافظ على برودة الأكل بطريقة طبيعية، بفضل تصميمها التقليدي اللي بيسمح للهوا يمرق ويوصل للأكل من غير ما تفوت حرارة الشمس.

طب كيف كانت النملية قديماً؟ كانت مقسمة لتلات أقسام: قسم فوقاني بيحطوا في الأكل الناشف، وقسم وسطي في أدراج للملاعق والسكاكين، وقسم تحتاني بيحطوا في مراطبين المونة والمخلل. حتى إنو كانت النملية جزء من جهاز العروس من زمان وكانت تعتبر هدية جهاز مهمة للبيوت الجديدة.

والشي المهضوم بالخبرية، إنو جدودنا كانوا يحطوا حدا زريعة ويزينوها بالشرشف المعرق أو المعروف بالدانتيل لتبين مرتبة. والزريعة كانت بأغلب الأحيان تنحط بتنك النيدو الكبار أو تنك المعلبات الزغار يلي كانوا يجلوهون وما يكبوهن.

النملية أكتر من مجرد خزانة أكل، هيي حكاية من زمان، ورمز للحياة والتقاليد اللبنانية القديمة.

مين بعد عندو نملية بالبيت؟

شوفوا كمان، أول فيديو كليبات لأشهر الفنانين اللبنانيين!