مدونة
سوق الرزق بالرزق اللي عمرو ٦٥٠ سنة، تعرفوا ع سوق الخان بحاصبيا
بسبب الظروف المأساوية اللي عم يمرق فيها جنوب لبنان، حبينا نضوي بهالمقال ع سوق تاريخي بضيعة حاصبيا الحدودية، تأثر بالوضع المتوتر بالجنوب، بس بعدو ما سكر! مشوا نتعرف سوا على سوق الخان بحاصبيا، ملتقى تجاري أثري وشريان الحياة بالجنوب.
سوق الخان التاريخي:
هو عبارة عن سوق تاريخي عمرو ٦٤٨ سنة وبعدو صامد لليوم، ويعتبر من الأقدم بلبنان. يعتبر نبض الحياة بقضاء مرجعيون، و وصلة حاصبيا وبوابة تجارية لمناطق ميس الجبل وحولا وعديسة وكفركلا وإبل السقي والخيام والقليعة وكفرشوبا وعين قينيا وغيرها من البلدات المجاورة.
Source: Janoubia.com
سوق التعامل ع مبدأ “الرزق بالرزق”
سوق مشيّد من الحجر القديم والكلس والتراب الأبيض، وما بقي منو إلا معالم بسيطة. تم إنشاؤه سنة ١٣٦٥ ميلادية من قبل والي المنطقة أبو بكر باشا (الشهابي). وكان نقطة إيواء للناس وعرض البضاعة البياعين وإستراحة قوافل التجار اللي جايي من جبل عامل والبقاع، الجولان السوري، وشمال فلسطين، وحتى الأردن.
والمميز بهالسوق انو ما كانوا يستعملوا النقد أو المصاري ليشتروا، كانت تتم عميلة تبادل البضايع يسموها “الرزق بالرزق”.
Source: Janoubia.com
كل تلاتا مننزل ع السوق!
ومن أكتر من مية سنة لليوم، هالسوق الشعبي بينطركن كل تلاتا بحاصبيا، وما وقف إلا بفترة الإحتلال من ١٩٨٢ ل ٢٠٠٠. ناس المنطقة بتفرش بسطاتها، وبيضل في عجقة بالسوق لأنو كلو أسعارو رخيصة وحلوة. وبتلاقوا فيه كل شي، وكتير مشهورين بياعين اللحمة المشوية والفلافل، ومن زمان كان معروف بالخيل والمواشي.
هالموقع الأثري بكل بساطتو وتاريخو الغني، عدا عن انو سوق تجاري شعبي بس كمان بتستعملوا بلدية حاصبيا لإقامة المهرجانات لأهل المنطقة. وفيكن تشوفوا كيف كان بال ١٩٦٧ بالفيديو هون:
خبرونا، حبيتوا قصتو؟ وشي مرة زايرين سوق الخان بحاصبيا؟
بتحبوا الجنوب؟ شوفوا قسمنا هون.