مغارة نبع فنيدق: منحوتة ربّانية بالصخر ونبع من تحت جريكن!

بتلاقوا بوحدة من قرى عكار الشمالية جوهرة جيولوجية منسية حبينا نضوي عليها بهالمقال: تعرفوا معنا على مغارة نبع فنيدق!

جوهرة بقلب ضيعة فنيدق!

ضيعة فنيدق من أروع ضيع الشمال! التسمية إجت من كلمة فندق لإنو كانو التجار بالزمانات يمرقوا فيها خلال رحلاتن ليرتاحوا يوم 

واتنين. هالضيعة معروفة بموقعها الاستثنائي بين الينابيع والأنهار و الطبيعة الحرجية العكارية. أبرزها جبال القموعة وغابة العزر النادرة والممتدة ع مساحة واسعة، واللي بيوصل طول شجرها ل ٣٥ متر وبيتنوع بين شجر العزر والأرز والشوح والشربين والصنوبر. 

ومن الطبيعي تلاقوا بهالطبيعة السحرية كهوف ومغارات ممكن بعد مش مكتشفينها! خصوصي انو طبيعة الصخور كلسية، ومنها مغارة نبع فنيدق بجبال فنيدق!

تكوين المغارة الداخلي: 

Image source: Discover.Akkar on Instagram.

 هالمنحوتة الطبيعية عبارة عن كهف بمحيط صخري وتضاريس مميزة، بيرجع للعصور الجيولوجية الأولى وطولو ١٦٠ متر تقريباً، قاعدة على إرتفاع من صخور حوالي ٧٥ متر. 

بتتميز مغارة نبع فنيدق بصخور جليدية متدلية من سقفه وبتلمع متل اللولو، وفيها نبع ميّ جارية دغري من تحت جريكن، شلالات غزيرة، وفتحات ضيقة كتير. النبع بعد لليوم مش معروف مصدرو من وين، وهيدا لقلة الدراسات العلمية والإكتشافات حول سر هيدي المغارة ونبعها المتدفق. 

المغارة المنسية

بالرغم من جمالها هالمغارة، مصيرها متل كتير من الجواهر الطبيعية بلبنان، منسية من قبل الدولة ومهملة من قبل وزارة السياحة. بس هالشي ما بيمنعكن انو تزوروها، لأنو في جهود محلية من مرشدين متخصصين محليين بتقدروا تروحوا معن وأبرزن مجموعة Discover Akkar.

خبرونا، حبيتوا هالجوهرة العكارية؟

حابين تقضوا نهار كامل عم تكتشفوا فنيدق؟ شوفوا دليل فنيدق السياحي بالمقال هون.