٧ محلات لتسترخوا بقلب بيروت!

مين ما بحب يزور محلات مريحة للنفسية وبتخليكن تسرحوا بأفكاركن لبعيد، خاصة هلق بما إنو الطقس صار أدفى وأحلى ورواق أكتر.

كمشوا إيد حبيبكن أو تمشوا مع أصحابكن وعيشوا تجربة مريحة رح تتذكروها كل ما تتعبوا أو يضيق خلقكن وما تنسوا تاخدوا أجمل الصور!

١. لا ميناجري La Ménagerie، الأشرفية

في أجمل من إنو تفوتوا على كافيه حجر ويطلع كمان محل ورود، بتشربوا أطيب فنجان قهوة سخنة وبتتحلوا أو بتاكلوا لقمة مالحة وبتشتروا أحلى وردة.

الرقم: 206 201 01

٢. بيت، مار مخايل

عبارة عن بيت بيروتي تقليدي، تفاصيل الكافيه بيتوتية ومكنكنة بتلاقوا عندو القهوة الطيبة مع قعدة تراس وكراسي قش بين الشجر والورود.

الرقم: 390 761 76

٣. متحف ميم، الأشرفية

هالمتحف المميز عبارة عن مغارة من الكنوز والجواهر المخفية. هالمتحف بيعرض معادن من خلال واجهات قزاز مشغول فيا على الإضاءة لتبين جمالية كل قطعة، مجرد تجي عينكن على وحدة من هالقطع المميزة رح تشعروا بالراحة النفسية.

الرقم: 672 421 01

٤. حشيشة قلبي، الجميزة

هل محل المهضوم عندو كل أنواع الشاي من أكتر من 30 صنف وأصناف حلويات وكيكات، طالعة منو ريحة الأعشاب والورود ومعروفة إنو ريحة الأعشاب بتروق الأعصاب وبترخي التشنج. واصطحبوا حدا بتحبوا على هيدا المكان وعيشوا تجربة بسيطة بس مليانة حب.

الرقم: 777 738 03

٥. أوريندا، مار مخايل

جوهرة مخفية بقلب مار مخايل، الجو كتير حلو وفي جنينة مهضومة مليانة عشب وورد. بقدموا قهوة، كوكتيلات لذيذة وفريش وأطباق نباتية لازم تجربوها.

الرقم: 886 927 03

٦. كافيه دو بينيلوبي، بادارو

هون بتشربوا فنجان الشاب إنتو ومسترخيين على التراس. أطيب مأكولات طليانية ناطرتكن مع قعدة بتروق الأعصاب وبتريح النفسية. بتحسوا حالكن بكافيه باريسي للحظة!

الرقم: 987 390 01

٧. مطعم سرسق، الأشرفية

هالمطعم عندو قعدة مهضومة وفخمة بنفس الوقت بتحسوا حالكن سافرتوا لبعيد وعايشين بغير عالم. الشجر بفيي قعدتكن وبتسردوها على حديث مهضوم أو دردشة غرام. الأكل كتير شهي وطريقة التقديم مميزة.

الرقم: 512 200 01

شوفوا كمان، ١٠ محلات لحم بعجين تجربوهن بلبنان!