أسرار حياة شروق صانشاين: شو لي ما بتعرفوا عن زوجة دكتور فود؟

شروق، أو شروق صانشاين، اللي فجأة صارت حديث السوشال ميديا، عرفت شهرة واسعة خلال زواجها وبعد طلاقها من جورج ديب، المعروف بـ”دكتور فود“. بس مين هي شروق؟ وشو أبرز التفاصيل عن حياتها؟

شروق ولدت بمدينة رام الله بفلسطين، وعاشت جزء كبير من حياتها بدبي. من صغرها كانت طموحة، وخاضت تجارب ومجالات مختلفة قبل ما تاخد شهرتها الأكبر من خلال تيك توك.

على المنصة، قدرت تجمع ملايين المتابعين من خلال محتوى كوميدي وترفيهي، بالإضافة لمقاطع الرقص ويومياتها وتفاصيل من حياتها الشخصية.

شهرتها الكبيرة فتحتلها باب عالم السوشال ميديا والنجومية، بس بنفس الوقت، حطّتها تحت الأضواء وخلّت حياتها الشخصية محط اهتمام ومتابعة دائمة.

زواجها من دكتور فود

سنة 2022، دخلت شروق مرحلة جديدة بحياتها بعد زواجها من جورج ديب، المعروف بـ”دكتور فود“، واللي اشتهر بمحتواه المرتبط بالأكل والطبخ.

الثنائي بلّشوا يظهروا سوا بشكل مستمر، وشاركوا جمهورهن تفاصيل من حياتهن، بالإضافة لمشاريع ومحتوى مشترك. حتى إنو أطلقوا ماركة شوكولا سوا، وروّجوا لعدد من المنتجات وشاركوا مغامراتهن اليومية.

من برا، كانت حياتهن الزوجية مليانة حب ومشاركة، بس الأمور ما بقيت هيك لفترة طويلة، خاصةً بعد ما بلشه الخلافات تطلع للعلن.

خيانة على الهوا مباشرة!

من أكتر اللحظات اللي أثارت الجدل، كانت لما شروق طلعت ببث مباشر على تيك توك وواجهت جورج قدام آلاف المتابعين، واتهمته بالخيانة.

خلال اللايف، حاول جورج يهدّي الوضع ويطلب منها تسكّر اللايف، حتى إنّه تواصل مع أمها وأخوها ليساعدوه، بس شروق كمّلت كلامها، ولمّحت لوجود علاقة بين جورج وشخصية معروفة على تيك توك.

وخلال البث، شاركت كمان تفاصيل عن موقف حصل معها، وقالت إنّها تركت ابنها اللي كان عمره 3 شهور بالفندق ولحقت جورج وهي حافية.

ورغم كل هالجدل، فاجأت شروق جمهورها بعدين بإعلان حملها بطفلها التاني. وقتها انقسمت الآراء بين ناس دعموها وناس استغربوا قرارها بالاستمرار بالعلاقة رغم كل مشاكل الخيانة اللي صارت علنًا.

حياتها اليوم

من فترة قصيرة، شروق أكدت طلاقها من دكتور فود، بعد فترة من الخلافات والمشاكل بين الطرفين، وقررت فتح صفحة جديدة بحياتها بعيدًا عن العلاقة. وأضافت إنّ قرار الطلاق إجا بعد ما غاب الاحترام والتفاهم عن العلاقة، وإنّها اختارت الانفصال حفاظًا على نفسها وعلى ولادها.

وبعد إعلانها عن تنظيم حفل طلاقها، اللي أثار ضجة كبيرة على السوشال ميديا، يبدو إنّ شروق عم تحاول تبدأ مرحلة جديدة بحياتها

واليوم، بعد كل اللي مرق فيه الثنائي، أكيد قصة شروق ودكتور فود بعدها محط اهتمام الجمهور، خاصةً مع كل التفاصيل اللي عاشوها قدام الكاميرا. وإنتو خبرونا، شو رأيكن بحفلة طلاق شروق؟

شوفوا كمان:

قانون خاص بالإنفلونسر وصانعي المحتوى بلبنان… قريباً