هيك بتزرع من بلكون بيتك بلا تراب… خضرة وفواكة طازة!
مين قال إنو الزراعة بدها أرض وخبرة وتعب كبير؟ خلّينا نعرّفكن على مشروع جديد بلبنان بيقدم حل بسيط وذكي ليزرع أي حدا خضرة بقلب بيته! Hydro Towers هو مشروع من تطوير المهندس الزراعي ميغال رامية، هدفه يخلّي الزراعة متاحة للكل، حتى لو ما عندك أرض ولا خبرة زراعية. الفكرة ببساطة إنو تعتمد على نظام الزراعة المائية (Hydroponics).
الميزة الكبيرة بهالنظام إنو ما بيحتاج تراب نهائياً! النباتات بتكبر مباشرة بمي غنية بكل العناصر الغذائية اللي بتحتاجها، وهاد الشي كمان بيخفّف الحاجة للمبيدات وبيقلّل الأمراض بالتربة.
وكمان الاستهلاك بالميّ أقلّ بنسبة بتوصل لـ 90% مقارنةً بالزراعة التقليدية، وحتى ما بيصرف كتير كهربا.
الأحلى إنو فيك تزرع طول السنة، مش مرتبط بموسم معيّن. يعني خس، نعناع، حبق، وحتى بعض أنواع الفواكه الصغيرة… كلّن فيهن يطلعوا بطريقة نضيفة، مرتّبة، وسهلة.
والشكل العامودي بيخلّي الموضوع عملي أكتر، لأنو بيوفّر مساحة كبيرة. يعني حتى شقّة صغيرة أو بلكون صغير فيهن يتحوّلوا لمساحة زراعية مصغّرة داخل البيت.
باختصار، Hydro Towers خطوة نحو زراعة مستدامة وسهلة بلبنان، وبتقرّب الزراعة من كل بيت.
للطلب أو الاستفسار: 501 150 79
وكمان فيكن تتابعوهن على إنستغرام.
