من بعد الحرب، أحلى أوتيل بصور فتح أبوابه من جديد!

بعد أشهر من الحرب، رجع L’Auberge de Tyr يستقبل ضيوفو من جديد بملاذه الهادي ع التلّ المطلّ على مدينة صور.

من وقت ما فتح أبوابو سنة 2019، صار L’Auberge واحد من أبرز الوجهات بالجنوب، مع إطلالة ساحرة على صور وتجربة بتجمع بين الراحة، الضيافة، والطبيعة. وصار المكان المفضّل لكتار وقت الويك-اند، الإقامات العائلية، أو حتى نهار هادي بعيد عن الضجة.

ويمكن اللي ما بيعرفو كتار، إنو L’Auberge بلّش أساسًا كنادي محلي للفروسية، قبل ما يتطوّر ويصير الوجهة المتكاملة اللي منعرفها اليوم. اليوم، المكان بيضمّ 20 غرفة للإقامة، 6 مسابح، حديقة حيوانات، مرافق لركوب الخيل، ومطعم بإطلالة مميّزة على الطبيعة والمناظر المحيطة.

ومتل كتير مؤسسات بجنوب لبنان، واجه L’Auberge de Tyr تحديات كبيرة خلال الحرب. ورجعة المكان اليوم هي جزء من مشهد التعافي اللي عم تشهدو المنطقة، مع مؤسسات عم ترجع تفتح أبوابها ومجتمعات عم تعيد بناء نفسها بإصرار وأمل.

حلو نشوف أماكن منحبّها بالجنوب عم ترجع تنبض بالحياة، ورجعة L’Auberge de Tyr بتشكّل علامة جديدة على التعافي، وبترسم أمل بمستقبل أحلى للمنطقة.

شوفوا كمان:

أجمل 55 محل تتفرجوا ع غروب الشمس بكل لبنان