بعد غياب… أفضل محل برغر ببيروت فتح من جديد بالنقّاش!

قبل ما تنتشر مطاعم البرغر بكل بيروت، كان في اسم الكل بيعرفه. بالنسبة لكتير ناس، Meats&Bread كان من أشهر محلات البرغر والسموك هاوس بالمدينة، واليوم عم يكفّي هالمشوار بعد انتقاله لموقعه الجديد بـ Zero4 بالنقّاش.

متل كتير من المؤسسات يلي تأثرت بانفجار مرفأ بيروت، اضطر Meats&Bread يسكّر فرعه المحبوب بالجميزة. ومن وقتها، غاب واحد من أشهر محلات البرغر ببيروت لسنين، قبل ما يرجع ويفتح أبوابه من جديد.

وبصراحة، كان من الأماكن المفضّلة عنا. ومن سنين، جرّبنا عندن الـ WTF Burger الشهير والـ Flapping Wings، ومن وقتها صاروا من الأطباق يلي ما فينا ما نطلبن.

شو في ع المنيو؟

إذا محتارين من وين تبلّشوا، هيدي أبرز اقتراحاتنا:

إذا عبالكن وجبة دسمة

مننصحكن تروحوا ع الكلاسيكيات: WTF Burger مع صوص زيادة، ومعه Flapping Wings. إذا أول مرة بتجربوه أو كنتوا من الزباين القدامى واشتقتوا لطعمة الأكل عندن، هيدا الخيار المناسب.

إذا رايحين مع الأصحاب

Nachos Cholo، Empanaditas، Elotes and Kale، وGarlic Parmesan Wings كلّن أطباق مناسبة للمشاركة. بتتحط بالنص، وكل واحد بيجرّب شوي، وهيك بتصير القعدة أحلى.

إذا موعد غرامي:
بلّشوا بسلطة اللبنة البلدية المدخنة مع اللحم البريسكت، وختموا الوجبة بآيس كريم.

المكان مناسب لـ…

القعدات الطويلة، الضهرات العفوية، وحتى الخطط السريعة يلي بتخلص بساعات من الأكل والحكي.

وإذا كنتوا من زباين Meats&Bread القدامى، رح تحسّوا إنو الهوية بعدها نفسها. يمكن العنوان تغيّر، بس الطعمة، الأجواء، والتجربة يلي بتحبوها بعدها متل ما هي.

قريباً!

بحسب البايو على إنستغرام، في قسم Deli عم يتحضّر. بعد ما أعلنوا تفاصيله، بس إذا كنتوا من محبّي المحل، أكيد تابعوهن لكل جديد.

بكل مرة منرجع منزور فيها محل، نحنا مش بس عم ندعم مطعم. هيدا دعم لمؤسسة قدرت ترجع توقف بعد أوقات صعبة، وتكمّل مشوارها.

جربتوا Meats&Bread بالنقّاش بعد؟

شوفوا كمان:

أم نزيه رجعت أخيرًا ع الأشرفية بعد انفجار ٤ آب