اليوم الياباني ناطركن…فعالية غير شكل بكرا بصيدا!

إذا بعدكن عم تفتّشوا ع نشاط مختلف عن كل اللي متعودين عليه، في تجربة مميّزة ناطرتكن هالخميس بحديقة نحيي الأرض بصيدا. هالمكان مش بس جنينة، إنما مساحة تشاركية للزراعة البيئية، بتجمع الناس حوالين الأرض، والطبيعة، والأكل، والأفكار البسيطة اللي بتخلّي أي نهار أحلى.

نهار الخميس 6 آب، من 5:30 المسا لحد 10:30 بالليل، رح تستضيف الحديقة اليوم الياباني، ببرنامج بيجمع بين الثقافة اليابانية والأجواء الهادية بقلب الطبيعة.

من أبرز النشاطات، جلسة طقوس الشاي الياباني مع الخبيرة ماريكو ديدوسي، يلي رح تتعرّفوا خلالها على فلسفة تحضير وتناول الشاي الياباني، وتشوفوا مراسمه التقليدية عن قرب، وكمان تتذوقوا الشاي. والجلسة كمان بتتضمّن فن تنسيق الأزهار الياباني، كجزء من تجربة حفل الشاي التقليدي.

أما إذا كنتوا من محبّي الأنيمي، ففيكن تحضروا عرض لأفلام ستوديو غيبلي، ومنها فيلم عدنان ولينا وفيلم  قلعة في السماء، ضمن أجواء هادية ومختلفة بتخلّي السهرة أحلى.

إذا حابين تشاركوا، لازم تسجّلوا مسبقًا عبر الرابط الموجود هون، لأن عدد الأماكن محدود.

وأكيد، ما رح تكتمل الأجواء من دون الأكل. طوال فترة النشاطات، رح يكون في صاج طازة ومشروبات وسناكات وحلويات لتستمتعوا فيها وأنتم قاعدين بين الشجر والطبيعة.

خبرونا، رح تشاركوا بفعالية اليوم الياباني بصيدا؟

شوفوا كمان:

انسوا صالات السينما… هالصيف فيكن تحضروا أفلام ع البحر!