مهرجانات وسباق…6 فعاليات رياضية هالشهر بلبنان

إذا الويك إند المثالي بالنسبة إلكن فيه ركض، هايكينغ، يوغا، أو أي نشاط بيخلّيكن تقوموا عن الكنباية، فأيلول مليان فعاليات رياضية بلبنان. من المهرجانات الرياضية للركض والهايكينغ والتجديف، هيدي أبرز الفعاليات يلي فيكن تشاركو فيها هالشهر.

1. مهرجان سنترو الرياضي، سنترو مول – جناح

التاريخ: من 11 لـ 13 أيلول 2026

على 3 أيام، رح يجمع مهرجان سنترو الرياضي براندات رياضية، نوادي، أكاديميات، ألعاب ونشاطات تفاعلية مختلفة. إذا بتحبوا الرياضة أو عبالكن تجرّبوا نشاط جديد، هيدا المهرجان بيكون فرصة حلوة لتكتشفوا عالم الرياضة بمحل واحد.

2. مهرجان MOVE FEST 2026، البترون

التاريخ: 13 أيلول 2026

نهار كامل مخصص للرياضة والحركة ع الساحل، مع أكتر من 10 حصص وتجارب مختلفة. فيكن تختاروا بين النشاطات، تتحركوا شوي، وبعدها تكفّوا نهاركن ع البحر.

3. فعالية الركض الأسبوعية مع Jounieh Run Club، جونية

التاريخ: 13 أيلول 2026

إذا الركض هو رياضتكن المفضلة، فيكن تنضمّوا لـ Jounieh Run Club بفعالية الركض الأسبوعية كل أحد. النادي تأسّس سنة 2025، وبينظّم ركضات جماعية للناس يلي بتحب تركض ضمن مجموعة وتتعرف ع عدّائين جداد.

4. سباق Bikfaya Eco Run، بكفيا

التاريخ: 20 أيلول 2026

خدوا الركضة لبرا المدينة وروحوا ع بكفيا للمشاركة بسباق بين الطبيعة وبأجواء صديقة للبيئة. خيار حلو إذا عبالكن تغيّروا عن مسارات الركض المعتادة وتجربوا طرقات الجبل.

5. هايك ويوغا ع النهر، بتلون وبطمة

التاريخ: 20 أيلول 2026

نهار بالطبيعة بين بتلون وبطمة، بيجمع بين الهايك وجلسة يوغا حد النهر. إذا بدكن نشاط رياضي بس بأجواء هادية وبعيدة عن عجقة المدينة، هيدا الخيار إلكن.

6. فعالية التجديف مع الفوانيس Glow Lantern Paddle، بالبترون

التاريخ: كل تلاتا وأربعا وخميس لحد 24 أيلول 2026

بدكن تجربة مختلفة بالبترون؟ جرّبوا جولة الـ Glow Lantern Paddle، وهي جولة تجديف بالليل مع إضاءة بتعطي التجربة جو مميّز. والنشاط متوفر بنص الأسبوع كمان.

نسينا أي فعاليات رياضية حلوة هالشهر؟ خبرونا!

شوفوا كمان:

بتعرفوا مطار بيروت فيه غرفة حسّية للولاد اللي عندن توحّد؟