9 محلات ببيروت إذا بتحبّوا الكاسيتات والفينيل

قبل الـplaylists و أنغامي، كانت الموسيقى تجربة بحد ذاتها. كنتوا تقلبوا بين أسطوانات الفينيل، ترجّعوا الكاسيت لورا، وتفتّشوا ع الألبوم اللي صرلكن فترة عم تدوروا عليه. وإذا بعدكن بتحبّوا الموسيقى القديمة و بتحبّوا تجمعوا الكاسيتات و الفينيل، هيدي 9 محلات ببيروت فيكن تلاقوا فيها كل شي من الأغاني القديمة للإصدارات النادرة.

1. Super Out، مار مخايل

فاتح من سنة 1979، وSuper Out من أقدم محلات الموسيقى ببيروت. عنده تشكيلة من الفينيل والـCDs والكاسيتات بمختلف أنواع موسيقى، وفيه كتير قطع قديمة فيكن تفتّشوا بينها لساعات.

2. Liban Cassettes & Vinyls، عين الرمانة

إذا عم تفتّشوا ع كاسيتات وفينيل قديم، هيدا المحل عنده تشكيلة كبيرة من موسيقى لبنانية و عربية قديمة، وخاصةً إصدارات اللي صعب تلاقوها اليوم.

3. Chico Records، الحمرا

Chico من محلات الموسيقى الشهيرة بالحمرا، وفاتح من سنة 1964. عنده أكتر من 10,000 أسطوانة، مع تشكيلة بتشمل الروك والجاز والسول و ديسكو، كمان موسيقى عربية قديمة ونادرة.

4. Deep Music، الحمرا

محل صغير بالحمرا، بس مليان كاسيتات قديمة. فيكن تلاقوا عنده أغاني لمطربين لبنانيين وعرب من أيام الزمن الجميل، وتفتّشوا بين مجموعة كبيرة من التسجيلات القديمة.

5. The Groovy Owl، الحمرا

من الروك الكلاسيكي والموسيقى العربية، لفنانين وموسيقى بديلة، The Groovy Owl عنده تشكيلة متنوعة للّي بيحبّوا يكتشفوا شي مختلف. وفيه كمان LPs و45s للي بيحبّوا يفتّشوا ع قطع مميّزة.

6. Beirut Vinyl Records، فرن الشبّاك

هالمحل بفرن الشباك عنده تشكيلة كبيرة من الأسطوانات اللبنانية والعربية والشرقية القديمة، بالإضافة لأسطوانات من مختلف أنحاء العالم.

7. Darsko Records، برج حمود

موجود بمعمل أحذية قديم ببرج حمود، وDarsko هو من الأماكن اللي رح يضيع فيها أي حدا بيحب يفتّش ع أسطوانات قديمة. عندن فانك، سول، جاز، سايكداليك، كراوتروك، أسطوانات عربية، وتسجيلات نادرة من الستينات والسبعينات.

8. Tweeter Music Shop، الجعيتاوي

هالمحل عنده تشكيلة من الفينيل، ودايمًا في إصدارات جديدة وLPs مميّزة بتنضاف ع الرفوف، فكل زيارة ممكن تخلّيكن تلاقوا شي جديد.

9. King Music Vinyl Records، برج حمود

هالمحل عنده تشكيلة كبيرة من الفينيل القديم والجديد، والـCDs والكاسيتات، وحتى الفونوغرافات. يعني إذا بتحبّوا الموسيقى القديمة أو عم تجمعوا أسطوانات، فيكن تلاقوا أكتر من شي هون.

وين بتشتروا كاسيتات و فينيل ببيروت؟ خبرونا!

شوفوا كمان:

بتحبوا التسوق أونلاين؟ 10 محلات Shopify مفضلة عنا بلبنان