شفت شجرة متضررة بلبنان؟ صار فيك تبلغ عنها!

إذا صادفت شجرة ميتة، أو شجرة متضررة، أو لاحظت شي غريب بمنطقة حرجية، صار فيك اليوم تبلغ عنها من خلال مبادرة جديدة أطلقتها مبادرة التحريج في لبنان (LRI).

هالمبادرة عم تطلب من الناس بكل لبنان إنهم يوثقوا الشجر أو الغابات اللي باين عليها إنها متضررة. البلاغات رح يتم مشاركتها مع وزارة الزراعة والخبراء المختصين. هنّي رح يكونوا مسؤولين عن تقييم كل حالة وتحديد شو الخطوات اللازمة بعدها.

وما في لزوم تكون خبير حتى تقدر تقدم بلاغ. النموذج بسيط، وبيطلب منك معلومات أساسية عن اللي شفتو ومكانه.

شو لازم تبلغ عنه؟

أول شي، النموذج بيطلب اسمك ورقم تلفونك، حتى يقدروا يتواصلوا معك إذا احتاجوا معلومات إضافية. بعدها، لازم تضيف موقع الـGPS للمكان المتضرر، وترفق صورة بتوضح الشجر أو المنطقة اللي لاحظت فيها الضرر.

بعدها، في قسم مخصص لتفاصيل الأشجار المتضررة، وفيك تضيف أكتر من ملاحظة إذا كنت شايف أنواع أو حالات مختلفة من الشجر بنفس المنطقة.

– إذا الشجر ميت أو متضرر جزئياً

– نوع الشجر، وفي خيارات متل الصنوبر، السنديان، الأرز، أو نوع تاني

-عدد الشجر المتأثر

يعني مثلاً، إذا لقيت 3 شجرات صنوبر ميتة وشجرتين تانيين متضررين جزئياً بنفس المنطقة، فيك تسجّل كل حالة كملاحظة منفصلة بالنموذج.

الهدف من هالمبادرة هو تحديد المناطق المتضررة وفهم أكتر حجم التدهور اللي عم يصير بالغابات بلبنان. يعني إذا لاحظت شي غريب وإنت عم تتمشى بالطبيعة، أو سايق بمنطقة حرجية، أو حتى مرقت حد غابة، صار فيك تساعد بتوثيقه عبر LRI.

فيك تبعت تقريرك للـLRI من خلال هالرابط، وتساهم بتكوين صورة أوضح عن حالة الغابات بلبنان.

شوفوا كمان:

إطلاق حملة «مليون كتاب للبنان» لإعادة بناء المكتبات المتضررة