وين تجربوا Pumpkin Spice Latte حول لبنان هالخريف؟

وصل موسم الـ Pumpkin Spice Latte، المشروب الخريفي اللي مننطره كل سنة! جمعنالكن 14 محل حول لبنان فيكن تمرقوا عليهن وتستمتعوا بهالنكهة المميّزة من اليقطين والتوابل والقرفة، وكمان تجرّبوا مشروبات خريفية تانية رح تحبوها من أول شفّة.

Joy Beirut – قريطم ورملة البيضا

هالكافيه ومحل الورد رح يصير من محلاتكن المفضّلة لتستمتعوا بكباية Pumpkin Spice Latte، خصوصًا إنّن بيحضّروه باليقطين الطبيعي! وكمان، إذا بتحبّوا تجرّبوا نكهات جديدة، عندن لاتيه بالتفاح رح يعجبكن كتير.

OURS Cafe، زحلة

مين قال إنّو مشروبات الخريف بس ببيروت؟ هالكافيه بزحلة محضّرلكن منيو خريفي روعة، فيه Pumpkin Spice Latte وحتى نسخة بالماتشا، بالإضافة لـ Cinnamon Roll Latte لعشّاق نكهة القرفة.

Neighbourhood، الجميزة

إذا بتحبّوا القهوة الطيبة والمخبوزات الشهية، لازم تمرقوا ع Neighbourhood بالجميزة! اطلبوا Pumpkin Spice Latte مع قطعة كيك جزر ع جنبها، واستمتعوا بترويقة أو بريك بتعدّل المزاج.

Blck Coffeeshop – قنطاري وبلس

هالكافيه المعروف بالقهوة المختصة بيقدّم واحد من أطيب مشروبات الـ Pumpkin Spice Latte ببيروت! إذا بتحبّوا نكهة اليقطين مع القرفة والتوابل الدافية، هيدا المشروب رح يكون خياركن المثالي بهالموسم، خاصةً مع طعمة القهوة الغنية والرغوة الكريمية يلي بتكمّل كل شفة.

Nayla، الأشرفية

نيلا بالأشرفية مش بس محل تاكلوا وتشربوا فيه، كمان فيكن تقضوا وقت حلو بأجوائه الدافية. مرقوا لعندن لتستمتعوا ب Pumpkin Spice Latte، وإذا جعتوا، عندن منيو فيه خيارات طيبة بتستاهل التجربة.

Michelle Bakes Cakes, البترون

إذا كنتوا بالبترون وعبالكن كيك مع قهوتكن، حطّوا Michelle Bakes Cakes ع الليستا! هالمحل المحبوب عم يقدّملكن قهوة بنكهات خريفية، من ضمنها Pumpkin Spice Latte الموسمي، لتكون ضهرتكن أحلى.

Brew and Butter – فرن الشباك، مصيطبة ووسط بيروت

إن كان الصبح أو الضهر، هيدا المكان المثالي لتوقفوا وتشربوا كباية Pumpkin spice latte. ولتكتمل التجربة، دللوا حالكن بكرواسون المقرمش أو رول بالقرفة جنب قهوتكن.

Urban Cup، ستاركو

عشّاق القهوة والماتشا، هيدي إلكن! Urban Cup محضّر نوعين من Pumpkin Spice Latte، واحد بالقهوة والتاني بالماتشا. والمميّز إنّن متوفّرين بس خلال شهر تشرين الأول، وكمان في نشاط رسم ع اليقطين كل ويك إند. يعني فرصة حلوة لتعيشوا أجواء الخريف بكل تفاصيلها!

Dreamers Bookshop Cafe، الجديدة

قهوة خريفية وكتاب حلو، شو بدكن أكتر؟ بـ Dreamers Bookshop Cafe، فيكن تستمتعوا ب Pumpkin Spice Latte بين الكتب، أو تختاروا شوكولا سخنة مع القرفة إذا عبالكن مشروب دافي. هيدي القعدة المثالية للأيام الباردة!

Oak Coffeeshop، فرن الشباك

مشروب الخريف المفضّل عندكن صار موجود عند Oak Coffeeshop! مرقوا لعندن بفرن الشباك، اطلبوا Pumpkin Spice Latte، وخدوا بريك صغير من عجقة النهار مع نكهة بتذكّرنا بأحلى أجواء الخريف.

Marhaba Hub، بعقلين

إيه، حتى ببعقلين فيكن تستمتعوا بـ Pumpkin Spice Latte! مرقوا ع Marhaba Hub واطلبوا مشروبكن الخريفي المفضّل، وإذا بدكن تجرّبوا شي مختلف، عندن كمان سحلب بالفريز. مين كان متوقّع هالتركيبة؟

Olea Cafe، ساحل علما

إذا كنتوا بساحل علما وعبالكن قهوة بنكهة الخريف، Olea Cafe ناطرلكن! جرّبوا Pumpkin Spice Latte مع كرواسون باللوز، أو Cinnamon Roll، أو قطعة كيك جزر. هيك بتكونوا دلّلتوا حالكن بأحلى طريقة!

Book a Coffee، برمانا

صباح بارد ببرمانا، كاسة Pumpkin Spice Latte، كتاب حلو وأجواء خريفية… إذا هيدي هي القعدة اللي عبالكن ياها، لازم تزوروا Book a Coffee! محل مناسب لتبلّشوا نهاركن ع رواق وتستمتعوا بفنجان قهوة دافية.

Fiore Patisserie – جل البحر، صور

إذا كنتوا بصور وعبالكن مشروب خريفي مع شي حلو، مرقوا ع Fiore Patisserie! هالمحل المعروف بحلوياته الشهية محضّرلكن Pumpkin Spice Latte مع الكريما ورشّة قرفة من فوق. يعني كل شفة فيها نكهة الخريف اللي منحبّها!

خبرونا، أي محل رح تختاروا حول لبنان لتدوقوا Pumpkin spice latte؟

شوفوا كمان:

وين تلاقوا سوق اليقطين الشهير بالبقاع؟