مراسلة جديدة ع تلفزيون لبنان… بس من الذكاء الاصطناعي!

بخطوة جديدة بعالم الإعلام و التكنولوجيا، قدّم تلفزيون لبنان وجه جديد رح ينضم لفريقه. «تاليا»، مراسلة ومذيعة رقمية بتعتمد على الذكاء الاصطناعي، ورح تشارك بتقديم الأخبار و البرامج على الشاشة الوطنية.

«تاليا» هي شخصية افتراضية بتقدر تقرأ الأخبار، وتقدّم معلومات و تقارير باستخدام تقنيات الذكاء الاصطناعي. و بتتميّز بقدرتها على الحكي باللغة العربية الفصحى واللهجة اللبنانية، لتقدّم محتوى إخباري بطريقة عصرية ومواكبة للتطور التكنولوجي.

احضروا فيديو «تاليا» اللي أطلقها تلفزيون لبنان:

وبحسب إدارة تلفزيون لبنان، «تاليا» مش بديل عن الصحفيين و الإعلاميين، ورح تكون أداة مساعدة إلهن وتدعم شغلهن. يعني الهدف من هالخطوة هو استفادة من إمكانيات الذكاء الاصطناعي لتطوير طريقة إعداد وتقديم الأخبار، مع الحفاظ على دور الإعلاميين البشريين، خاصةً لتغطيات ميدانية ونقل الأحداث.

وانعمل المشروع بالتعاون مع الشركة السعودية «Points» وبلال كساسير، بإشراف رئيسة مجلس إدارة تلفزيون لبنان إليسار نداف، وبفترة زمنية قياسية. وبتجي هيدي المبادرة ضمن خطة أوسع لتحديث الشاشة الوطنية وإدخال تقنيات جديدة بمجالات الإعلام و الأخبار و الترجمة.

بس دخول الذكاء الاصطناعي على غرف الأخبار بيفتح كمان باب للنقاش حول دقة المعلومات، و مصداقية المحتوى، وكيفية تنظيم استخدام هالتقنيات، والأهم كيف ممكن الاستفادة منها من دون ما تأثر على دور الصحفيين و الإعلاميين.

وهيك، تلفزيون لبنان عم يواكب التطورات بعالم الإعلام و التكنولوجيا، وعم يجرّب تجربة جديدة على شاشته مع مراسلته الرقمية «تاليا»!

شوفوا كمان:

روبوت للبحث والإنقاذ تحت الأنقاض… مشروع 3 خريجين هندسة!