اليقطين وأجواء الخريف ناطرينكن بسوق دير تعنايل!

تخيّلوا نهار خريفي بالبقاع، بين ألوان اليقطين، البساتين، ريحة الأكل البيتي والمنتجات البلدية الطازة! هالأجواء رح تكون ناطرتكن نهار الأحد، 8 تشرين الثاني، بدير تعنايل! مع سوق المزارعين اللي بتنظّمه جمعية JCI، وبيجمع خيرات الأرض والمنتجات المحلية بأجواء خريفية مميّزة.

هالمرة، السوق مش بس فرصة تتسوّقوا و تكتشفوا منتجات محلية، كمان لتعيشوا أجواء الخريف بكل تفاصيلها! من زاوية اليقطين اللي رح تكون من أبرز محطّات الفعالية، للديكورات و الألوان، كل تفصيل رح يضيف لمسة خريفية حلوة.

وأكيد، البقاع يعني أكل طيب! رح تقدروا تبرموا بين كيوسكات الأكل وتجرّبوا تشكيلة من الأكلات البيتية والحلويات والنكهات الموسمية اللي بتكمّل هالأجواء.

وبين جولة وجولة، فيكن تكتشفوا كمان خيرات البقاع، من المونة البلدية والخضرة والفواكه الطازة، للأشغال اليدوية والمنتجات الحرفية المصنوعة بإيدين لبنانية. وهي فرصة حلوة تتعرّفوا فيها على المزارعين والمنتجين المحليين، وتدعموا شغلهن وإنتاجهن مباشرةً.

وإذا جايين مع الولاد، إلن حصّتهن من المرح مع ألعاب وورشات وأنشطة ترفيهية، ليكون السوق مشوار عائلي فيه شي لكل حدا.

يعني إذا بعدكن عم تدوّروا على مشوار حلو لهالأحد، سوق المزارعين بدير تعنايل هو فرصتكن تقضوا نهار بين اليقطين، الأكل الطيب، خيرات الأرض وأجواء الخريف، وبنفس الوقت تدعموا الإنتاج المحلي. فبدل ما تقضوا الأحد بالبيت، لمّوا العيلة واطلعوا عالبقاع.

📅 الأحد، 8 تشرين الثاني
⏰ من 10 الصبح للـ 5 المسا
📍 دير تعنايل – البقاع

شوفوا كمان:

وين تلاقوا سوق اليقطين الشهير بالبقاع؟