شارع بالبترون صار يحمل اسم الفنان جورج خبّاز!

صار في شارع بالبترون يحمل اسم جورج خبّاز! الممثل والكاتب والمخرج اللبناني تمّ تكريمه بهالطريقة بمدينته البترون، تقديراً لكل اللي قدّمه للفن اللبناني بالمسرح والسينما والتلفزيون.

أعلن رئيس بلدية البترون مارسيلينو الحرك عن هالخطوة خلال افتتاح الدورة العشرين من مهرجان بيروت الدولي للأفلام القصيرة بكازينو لبنان، بتاريخ 1 تشرين الثاني 2026. وإجا هالتكريم بنفس فترة عيد ميلاد جورج خبّاز الـ50، فكانت هدية مميّزة إلو بهيدي المناسبة.

ليه اختاروا هالشارع؟

جورج خبّاز عبّر عن فرحته وتأثّره بهالخبر بمنشور على إنستغرام، وقال إنو ما كان متوقّع أبداً يتلقّى هالهدية بعيد ميلاده. وشارك قديش البترون بتعني إلو، وإنو كل شارع فيها بيرتبط بذكرى حلوة، من طفولته والناس اللي عرفن فيها.

والأحلى إنو الشارع اللي صار يحمل اسمه هو نفسه الشارع اللي كبر فيه وقضى فيه طفولته، وصوّر فيه كمان فيلمه «غدي» سنة 2013. بهالشارع كان يلعب ويعيش تفاصيل يومياته، ومنه كان يروح ع المدرسة، وكمان وصل من خلاله لأول تجربة مسرحية إلو بساحة مار إسطفان.

جورج خبّاز وبصمته بالفن اللبناني

على مرّ السنين، صار جورج خبّاز من أبرز الفنانين بلبنان. اشتغل بالمسرح و السينما و التلفزيون، وكتب وأخرج أعمال كتيرة جمعت بين الكوميديا و المواضيع الإنسانية، وقدرت توصل للناس وتحكي عن حياتهن و تجاربهن.

بلّش مشواره بالمسرح سنة 1994، وكان عمره 17 سنة بس. ومن وقتها، كتب وأخرج ومثّل بأكتر من 18 مسرحية. وشارك كمان بمسلسلات تلفزيونية كتيرة، منها «عبدو وعبدو» و «براندو الشرق»

بالسينما، شارك بأفلام مثل «تحت القصف» (2007) و «سيلينا» (2009). أما بفيلم «غدي» (2013)، فكان الكاتب والممثل الرئيسي، والعمل من إخراج أمين درّة. وتصوّر جزء من الفيلم بالبترون، وبيحكي عن أب بيحاول يحمي ابنه من أحكام الناس، وبيسلّط الضو على تقبّل الاختلاف.

وشارك كمان بفيلم «وينن» (2014) ككاتب ومشرف إبداعي.

بالفترة الأخيرة، ظهر بفيلم «يونان» من إخراج أمير فخر الدين. وبعيداً عن التمثيل، عنده كمان تجارب بالموسيقى، وكتب ولحّن أغاني. وبسنة 2023، أطلق أول ألبوم إلو بعنوان «جايي الأيام»، بالتعاون مع الفنانة لينا فرح.

كمان عنده خبرة بتعليم المسرح ومساعدة المواهب الشابة على تطوير قدراتها.

الفنانين اللبنانيين بيستاهلوا كل التقدير!

تسمية شارع باسم جورج خبّاز هي هدية مميّزة بعيد ميلاده الـ50، وخاصةً إنو هيدا الشارع بالذات بيحمل ذكريات طفولته وأحلى مراحل حياته. وهلّق، المكان اللي كبر فيه رح يحمل اسمه ويتذكّره الناس من خلاله.

وهالخطوة كمان بتذكّرنا بأهمية تقدير الفنانين اللبنانيين اللي ساهموا بالفن والثقافة ببلدنا، من ممثلين ومغنّين لكتّاب وموسيقيين ومخرجين. لأنو الفن اللبناني بيستاهل دعم واهتمام أكبر، والفنانين اللي عم يتركوا بصمة فيه بيستاهلوا نشكرن ونحتفل فيهن.

ابعت هيدا المقال لحدا بيحب يزور شارع جورج خبّاز بالبترون!

شوفوا كمان:

سيرك لبنان رجع ع بيروت، وهيدي أسعار التذاكر!