لقينا ١٩ مطعم بقدم مأكولات بحرية مع منظر بطير العقل

كلنا بيجي على بالنا نزور مطاعم على البحر بتقدم ثمار البحر ومأكولات بحرية ولبنانية على أنواعها بهيك طقس، ومنفرح ومنحس بالراحة النفسية بس نلاقي مطاعم موجودة على البحر عندها منظر بيطوش مع قعدة بالهوا الطلق ولقمة طيبة. لهيك اليوم رح نعرفكن على ١٩ مطعم بيعملوا أطيب أكلة سمك وثمار بحر مع منظر بيحبس الأنفاس ورح نبلش مشوارنا من العاصمة بيروت لنرجع نروح على جونية وجبيل والبترون وأنفه وشكا وطرابلس قبل ما نميّل على الجنوب لنزور صيدا وصور.

١. بيت السمك، صيدا

رح نبلش مشوارنا بمدينة صيدا الفينيقية ونروح على الكورنيش البحري لنشوف شو سر السمك عند هل محل. السمك بهل محل طازة من البحر محضر خالص بأشهى الخلطات بيتقدم مع أطيب المقبلات ليوصل على طاولتكن. الأكل كتير طيب عند بيت السمك والقعدة على التراس شرحة كتير رح تخليكن تشعروا بالراحة النفسية.

الرقم: 010 382 03

٢. سمكة جرجي الضيعة، أنفه

هل مطعم بتفوح منو ريحة أنفه، وشط أنفه الكريستالي، أول ما توصلوا رح تحسوا حالكن بشي حلم. بقدم مطعم سمكة أجود أنواع الأطباق اللبنانية، السمك وثمار البحر مع ديكور بحري وقعدة مكنكنة. بهل محل رح تنغرموا بثمار البحر من أول وجديد وتدوقوا كل الأصناف الطيبة، المحضرين بحب وحنيّة ودقة.

الرقم: 693 127 03

٣. لو فينيسيان، صور

رح نمرق بجولتنا على مدينة صور، عروسة البحر لنشوف هل مطعم الساحر، رح توصلوا تتفرجوا على عظمة شط صور وتسترجعوا مجد الحضارات القديمة، متل ما إسمو بدل علي: الفينيقي رح ياخدكن بإيدكن ويرجعكن على إيام زمان وقت كان الصياد الفينيقي يجول العالم حامل صنارة بإيدو ولبنان بقلبو. رح تاكلوا أطيب سمك وثمار البحر مع منظر بياخد العقل والقلب على البحر.

الرقم: 564 740 07

٤. المندلون sur mer، بيروت

هلق رح نروح على العاصمة لنشم هوا بيروت لي ما بينشبع منو وناكل أكلة سمك غير شكل مع ثمار البحر والمقبلات. هل محل مش من زمان رجع فتح، موجود على البحر، بيتمتع بديكور فخم كتير وبقدم أكل لبناني، مأكولات بحرية ومقبلات باردة وسخنة.

الرقم: 404 400 03

٥. سان ستيفانو ديل مار، البترون

مين مغروم بالبحر وريحة البحر؟ هل مطعم بياخد العقل موجود على مينا البترون بطل على أجمل منظر وبيتمتع بقعدة غير شكل وبيعمل أطيب أكلة سمك بهل شوبات. هل مطعم جار السما وبنام على كتف السنسول ليمنحكن تجربة استثنائية، وأكل لذيذ.

الرقم: 323 131 03

٦. يام سيفود Yam Seafood، صور

إذا صور على بالكن، هل محل رح تلاقوا قبالكن. مطعم يام من كلاسيكيات المنطقة معروف باللقمة الطيبة وأكلات السمك الغير شكل متل السمك المقلي والمشوي، الباني، القريدس، الصيادية، سمك المشكل، السومو والفيلي والمازة اللبنانية الشهية. هل مطعم بطل على بحر صور وبياخدكن مشوار على عالم مليان سمك ومي وحب.

الرقم: 646 104 71

٧. لو ماران، البترون

منرجع على البترون لنشوف هل محل المتخصص بالمطبخ اللبناني التقليدي، والقعدة عندو كمان على البحر. هل مطعم واسع وشرح والخدمة الممتازة والأكل الطيب والكرم موجودين هون والقعدة على التراس والبحر تحتكن رح تاخدكن على عالم تاني.

الرقم: 016 744 06

٨. مالينا، حبيل

وهلق رح نروح على مدينة الحرف، حبوبة قلبنا لنشوف هل جوهرة، بس تمشوا بالشارع العتيق وتكفوا صوب المينا رح توصلوا على مطعم ساحر حد البحر بيعمل أطيب مأكولات بحرية مطبوخة مع الباستا وأطباق لبنانية وأطباق البحرالمتوسط مع منظر بياخد العقل على السنسول وقعدة وجنينة زغيرة بيسحروا النظر وبخلوا القلب يدق. إذا رايحين على سوق جبيل العتيق قبل، أكيد قاطعين من حدو ولفتلكن نظركن.

الرقم: 111 544 09

٩. مرشاق على البحر، البترون

عند مرشاق رح تلاقوا أكلات سمك غير شكل مع جلسة على البحر وجو بتروني أصيل، بتوصلوا، بتنزلوا بدرج حجر مغطى بالورود داير من دار لتنقوا طاولتكن المفضلة، كل شي فريش رح يجي على صحنكن والجو رومانسي كتير وصوت البحر رح يخلي قلبكن يدق.

الرقم: 888 948 76

١٠. ملك البحر، جبيل

مين بحب البحر وريحة البحر وأكل البحر والسمك؟ هل محل إسم على مسمى، رح ياخدكن رحلة على البحر لتحسوا حالكن باليونان أو يمكن بإيطاليا. بقدم ملك البحر قعدة حجر تقليدية مع كراسي قش وزهور، وهوي متخصص بالمأكولات البحرية والجلسة عندو بتعبي الراس والبطن.

الرقم: 559 762 711

١١. شي زخيا، جونية

مطعم مأكولات بحرية على البحر بطل على أجمل منظر وعندو قعدة غير شكل وبيعمل أطيب أكلة سمك ومشروبات. هل مطعم جار البحر والسمك بيعمل كل شي ثمار البحر بيخطر على بالكن بطريقة طيبة ليمنحكن تجربة استثنائية: تخايلوا الموج عم بطير حدكن وإنتو عم تاكلوا هل أكل الطيب.

الرقم: 222 846 03

١٢. باب المينا، جبيل

مطعم تراثي على مينا جبيل بطل على أجمل منظر وبيتمتع بقعدة غير شكل وبيعمل ألذ مأكولات بحرية. هل مطعم جار القلعة وبنام على كتف المينا الأثرية ليمنحكن تجربة استثنائية.

الرقم: 475 540 09

١٣. السلطان ابراهيم، كازينو لبنان-جونية

مطعم لبناني أصيل بقدم أطيب المأكولات الشرقية والبحرية والأسماك مع قعدة فاخرة على البحر.

الرقم: 753 853 09

١٤. شي فؤاد، أنفه

بس تمشوا بقلب مشروع تحت الريح، رح توصلوا على هل مطعم الساحر. المي حواليكن والبحر تحت إجريكن والأكل الطيب بين إيديكن، هيدا الشعور لي رح تحسوا بس تكونوا هون. بس تخلصوا أكل أكيد فيكن تعملوا سبحة أو تتأملوا جمال البحر لي ما بخيب.

الرقم: 117 830 70

١٥. الفدار بيتش هاوس Fidar Beach House، الفدار-جبيل

أجمل قعدة على البحر رح تلاقوها بالفدار، مع ورود مزينة وأكل طيب وديكور عصري مفرفح ألوان. الزوار بيقدروا ينزلوا يسبحوا بالشط المجاور بس يخلصوا أكل.

الرقم: 793 783 81

١٦. أوسياندا، الصفرا

من أجمل القعدات الرومانسية على البحر رح تشوفوها هون، بقدم هل محل جميع أنواع المأكولات البحرية والسمك وبيضفي عليهن لمسة سحر وجمال وحب.

الرقم: 061 854 09

١٧. وسيم على البحر، أنفه

هلق رح نرجع على مدينة أنفه الشمالية، المعروفة بجمال البحر والملاحات البحرية والقلعة الفينيقيه لنتعرف على هل مطعم جار وصديق البحر لي بقدم أطيب المأكولات الشرقية والأطباق البحرية والمقبلات بالإضافة للمشروبات والكوكتيلات.

الرقم: 124 180 70

١٨. الشط الفضي، طرابلس

منطلع على طرابلس وتحديداً على المينا لنشوف هل مطعم اللبناني لي بقدم كل أنواع المأكولات البحرية والشرقية مع إطلالة مميزة على البحر. ليالي الصيف على طول مضواية بهل مكان بسبب الحفلات الفنية والغنائية لي بياخدوا الزوار من خلالها على رحلة مليانة حب.

الرقم: 385 601 06

١٩. نسمة غنوة، عمشيت

أول ما تفوتوا من باب هل محل رح تحسوا حالكن سافرتوا على جزيرة باليونان، كل شي حواليكن أبيض وأزرق والمي تحتكن. المكان مزين بالزهور وريحة البحر مع أضوية خافتة بتضفي على المحل سحر وجمال. رح على طاولتكن مازة لبنانية على أنواعها وكل أنواع السمك وثمار البحر البيتوتية المعمولة بأطيب الخلطات.

الرقم: 227 454 03