٨ أكلات لبنانية بيتوتية ودافية لوقت الخريف
في أحلى وأطيب من أكلة أو يخنة لبنانية دافية بسقعة الخريف ورواقه؟ كلنا منحب لبنان بالخريف و كيف المناظر بتقلب ألوانها لدافية وحمرا و صفرا ، كتار منا بيطلع عبالن يتمشوا ساعات وساعات بالطبيعة أو يقعدوا بدفى البيت ويذوقوا أكل لبناني بيتوتي طيب. كرمال هيك، شوفوا معنا ٨ أكلات لبنانية بيتوتية ومثالية بوقت الخريف.
١- قمحية
أكلة شمالية بإمتياز، محضرة من كمشة قمح مقشور وشوية زبدة ورشة محل، مستوية منيح على النار لياخدو على بعضن. أكلة ضيعة بسيطة بس طيبة كتير!
٢- كوسى محشي مع ورق عنب باللحمة
المحاشي من أهم الطبخات اللبنانية المناسبة للخريف. مين ما بحب كوسى محشي باللحمة المفرومة والرز والبهارات ومصفوف حدا ورق عنب يلي كلنا منعرف أديش طيب؟
٣- كبة حيلة
من أدفى وأطيب الأكلات! شوربة مع كبب من البرغل واللحمة بمرقة اللحمة واشهى البهارات، واكيد بينضاف عليها حمص حب.
٤- الملوخية
معقول ما نذكر الملوخية؟ اليخنة الكلاسيكية والطيبة مع صدر الدجاج و بتتميز بطعم التوم والحامض والكزبرة والبهارات والحر. كل شي بيلزمكن لتحسوا بالدفى.
٥- البامية
الخليط بين البامية وصلصة البندورة الغنية والبهارات بتخلي هيدي اليخنة أطيب شي لوقت الخريف.
٦- ساندويشة لبنة و زعتر
خصوصي مع موسم قطاف الزيتون! هيدي الترويقة البسيطة اللبنانية وخاصة من أيدن التيتا بتذكركن بأيام المدرسة، وأديش كنا نحب نضلنا دفيانين تحت اللحاف بدل ما نقوم بعز السقعة و ننطر الأوتوكار.
٧- الصفوف
كيك كتير خفيف وطعمه الحلو بناسب الكل، حتى يلي ما بحبو طعم الحلو كتير. بتتميز بطعمة الكركم والفانيلا ومتعودين نشوفها بالصينية مزينة بالكاجو. الصفوف هي حلو لبناني مثالي مع كباية شاي أو فنجان قهوة عالصبح.
٨- شوربة العدس
أكيد ما فينا نحكي عن الشتاء وأكلات الخريف بلا ما نجيب سيرة هالاكلة! أول ما تغيم، بتلاقي هالطبق نزل عالسفرة.
حبيتوا هيدي الفقرة من الأكل اللبناني؟ شوفوا كمان: تعرفوا على أكلات شعبية من مختلف الضيع اللبنانية
