لمحبي القراءة : ٧ محلات للكتب المستعملة ببيروت

عبالكن تقروا شي كتاب من الجلدة للجلدة؟ بقولوا الكتاب أحلى صاحب ، بس نظراً للوضع الإقتصادي الحالي بيصعب علينا نشتري كل كتاب بيخطر عبالنا. كرمال هيك جبنالكن ٧ محلات للكتب المستعملة ببيروت بتجمعلكن متعة القراءة مع السعر المناسب والجودة. كفوا معنا لتعرفوا تفاصيل!

١- مكتبة حلبي – الحمرا

أكتر مكتبة محبوبة ببيروت! مكتبة عتيقة ومكنكنة على بعضها، مخبية كل شي بيخطر عبالكن، خاصةً إنو عندن مجموعة كبيرة من الكتب والروايات العربية القديمة والمعاصرة.

الرقم: ٠١٨٥١١٥٤ | ٧١٥٠١٠٩٣

٢- بازار الكتب – الحمرا

بازار معروف بأكوام و أكوام من الكتب المصفوفة فوق بعضها، وإذا بتفتشوا منيح بتلاقوا كنوز ثقافية نادرة. إذا بتحبوا تجمّعوا الكتب العتيقة والفريدة من نوعها، رح يصير بازار مكانكن المفضل.

الرقم: ٨١٢٨٨٢٢٣

٣- سوق الأحد – برج حمود

ما بتعرفوا شو ممكن يكون مخبيلكن سوق الأحد. أوقات بتنقش معكن، وأوقات لأ. بس إنزلوا وفتشوا صح وأكيد بتلاقوا أشيا كتير حلوة ولقطة!

٤- برزخ – الحمرا

برزخ بقدملكن مختلف الخدمات لزيارة ممتعة، جو مكنكن، وأكل شهي، وقهوة طيبة، ومجموعة واسعة من الكتب الكلاسيكية المستعملة. إذا بدكن كتب فلسفية قديمة، كمان بتلاقوهن عند برزخ.

الرقم: ٧٦٦٧٨٨٥٦

٥- مكتبة محمد المغربي – جسر الفيات

تتذكروا المكتبة تحت جسر الفيات يلي احترقت هيديك السنة؟ إذا بتزوروا المكان مرة تانية ، بتشوفوا المكتبة رجعت متل قبل، خاصة يوم الأحد!

٦- Aaliyas Books – الجميزة

مكتبة و كافيه محبوب ومعروف بالجو الحلو والنبيد ومجموعة كبيرة من الكتب الإنجليزية المستعملة. إذا عم تبرموا كتب كلاسيكية أكيد بتلاقوها عندن.

الرقم: ٠١٥٦٦٣٧٥

٧- Books.Lebanon – أونلاين

كمان جبنالكن شي إذا بتحبوا تشتروا أونلاين ومن البيت. بتلاقوا عند Books Lebanon كل شي عبالكن وخاصة الكتب العربية! تواصلوا معن وأطلبوا عبر حسابن على الإنستغرام.

شوفوا كمان، اتعرفوا على ٦ معالم تاريخية منسية ومخباية بقلب بيروت.