بالقلب.. مسلسل لبناني جديد

الخميس ب ١٠ تشرين الاول انطلقت اول حلقة من المسلسل اللبناني الجديد “بالقلب” للكاتب المبدع طارق سويد. المسلسل عم ينعرض الساعة ٩ على قناة ال LDC وال LBCI من الخميس للأحد.

أبطال المسلسل هني من كبار الممثلين اللبنانيين: كارمن لبس، بديع أبو شقرا، رندة كعدي، دارينا الجندي، غبريال يمين، سارة أبي كنعان، وسام فارس، جان دكّاش، ستيفاني عطالله.

من قبل ما يبلش المسلسل والتفاعل كان كبير من الجمهور اللبناني والحماس كان واضح من كتاباتهن على مواقع التواصل الاجتماعي. حُبّهم ل طارق سويد الانسان، الممثل والكاتب كانت كفيلة انهن يدعمو المسلسل من قبل ما ينعرض. وكالعادة، طارق سويد ما خيّب امل المشاهدين. من ٤ حلقات بس قدر بالحوار السلس والمرهف بالاحاسيس والأداء المقنع انو يفوت على قلوب كل مين عم يحضر. والمسلسل بحسب رأي عدد كبير من المتابعين اللي عبّروا عن فرحتهن باتقان الممثلين للادوار وتكامل النص مع التصوير والاخراج.

وعبّر عدد كبير من المواطنين، الاعلاميين، والممثلين باعجابن بالمسلسل خاصة انو الدراما اللبنانية بتفتقد لهيك قصص واقعية.

❤️ #بالقلب https://t.co/BIvN0nxB7Y

— Tarek soueid (@Tareksoueid) October 14, 2019

#مسلسل_بالقلب..حبكة درامية مشوقة من واقع المجتمع يتصدر قائمة المشاهدات الدرامية في #لبنان✨✨https://t.co/U1lxjTrJjV

— ET بالعربي (@ETbilArabi) October 14, 2019

استاذة كنت تابعلا كتاباتا من قبل ما فوت عهل مجال.. مين منا ما حضر اكتر من مرة " بنات عماتي و بنتي و انا"؟ مين ما عشق "عشق النساء"، مين ما منا ما قال " و أشرقت الشمس" ما بيجي متلو؟.شو بحب الناس الحلوين اللي بيدعمو و بحبو و بيفرحو لنجاح غيرن.. كل التقدير و الاحترام ست منى طايع… pic.twitter.com/Rl5JRSGfGi

— Tarek soueid (@Tareksoueid) October 14, 2019

المسلسل بيحكي عن الواقع اللبناني وكل قصة وتفصيل مرقت بحياة كتار من اللبنانيين وعاشوها. “بالقلب” بيحكي عن قساوة المجتمع والأحكام المسبقة اللي بتتاخذ بحق شخص ما الو ذنب بفعل غيره. أو لما فرحة شخص بسلاحه المتفلّت بتنهي حياة انسان ما الو ذنب بجهل غيره وعدم وجود مين يحاسبه من المعنيين.

#بالقلب ❤️❤️❤️ https://t.co/8jG1JeZPhd

— Tarek soueid (@Tareksoueid) October 13, 2019

ديانا “سارة أبي كنعان” عانت من نظرات الناس وتلطيشاتهن الها بعد اللي عملته امها امال “دارين الجندي” بحياتها وكيف أثّر على حياة بنتها. وبعد قصة حب ظهرت بالمسلسل من الحلقة الاولى، كانت صدمة للمشاهدين لمّا بموت ناهي “وسام فارس”، عريس جديد برصاصة طايشة قدام عيون زوجته. انتهاء دور ناهي كان غير متوقع، خاصة انو بأغلب المسلسلات البطل ما بموت. بس لان المسلسل نابع من قصص حقيقية كان واقعي وبعيد عن الخيال.

أما النجم بديع أبو شقرا، فظهر بالحلقة الرابعة وقصته بعدها غامضة.

رصاصة مجرم وحش تقود “بالقلب” الى الصدارةhttps://t.co/kofud24hkG@Tareksoueid @LbciLebanon @LdcLebanon @saraabikanaan@BadihAbouChakra @C_lebbos pic.twitter.com/mzxmLbN9o6

— bisara7a.com|بصراحة (@bisara7a) October 13, 2019

المسلسل رغم انو بعدو بأول حلقاته بس واضح فيه الرقي بالحوار وتكامل الاحداث اللي عم تسلط الضوء على ابعاد ثقافية واجتماعية وكتير قضايا بلبنان.

“بالقلب” من الواضح انه رسالته نابعة من قلب الكاتب ومشاعره اللي عاشها وسمع فيها ببلده لبنان، ومن الاعمال اللبنانية اللي بيستاهل دعمنا ومتابعتنا.

مشاهدة ممتعة!