هيك تفاعلوا مغنيين وممثلين لبنان مع الثورة

شهدنا بالأسابيع الأخيرة انتفاضة شعبية واسعة بكافة المناطق اللبنانية سارك فيها أعداد كبيرة من كافة الأعمار والطبقات الاجتماعية. وخلال أيام تحولت من تظاهرات لثورة بتجمع عدد كبير من ممثلين ومغنيين لبنان اللي عم يحلموا يساعدوا بناء بلدهن بطريقة حضارية وسلمية. خلينا نذكر بعض الفنانين والطرق اللي شاركوا فيها.

ندى أبو فرحات

ندى من أبرز الوجوه الفنية اللي عم تمارس حق التظاهر بطرق سلمية. انتشر فيديو لندى على التواصل الاجتماعي عم تعيد تركيب الخيم بساحة الشهدا ب بيروت وقت صار في اعتداء على المتظاهرين. ردة فعل بتبين على احترام ورقي ندى. كمان شفنا موقف مؤثر لندى على شاشة الجديد وقت بكيت وقالت “هلكتونا.. ما بدنا ولا حزب بالسلطة”.

اليسا

كمان الفنانة اليسا شاركت بأحد التحركات الشعبية بوسط العاصمة بيروت. قابلها عدد من الصحافيين وسألوها عم موقفها الوطني فشاركت المطالب الشعبية وقالت “بدنا نعيش بكرامة”

نادين لبكي

اللي عم بتابع أحداث وتطورات الثورة ب لبنان بشوف دور قوي وحضور بارز للمخرجة اللبنانية نادين لبكي. نادين ظهرت بأكتر من مقابلة ووجهت كلمات مؤثرة وإنسانية. بيربط علاقة قوية بين الشعب اللبناني والمخرجة نادين بسبب أعمالها الناجحة يلي دايماً بتحمل معها وجع انساني.

وسام حنا

من أول أيام الانتفاضة الشعبية بلبنان منلاحظ موقف ثورجي ثابت للممثل ومقدم البرامج وسام حنا. أنا شخصياً مبهر بحديثه وجرأته. وسام بيعتبر انه عرّض حياته وحياة عيلته ونجوميته للخطر ايماناً بنجاح هالثورة.

بديع أبو شقرا

كمان الممثل اللبناني بديع أبو شقرا فرجا عن مواقفه الداعمة للحراك، فكان اله دور ناشط خلال الثورة اللبنانية وكان عم يتواجد بشكل يومي بالساحات اللبنانية.

مرسيل خليفة

زار لبنان من شماله لجنوبه وانضم للحشود الشعبية وشاركهن ثورتهن. مرسيل خليفة اللي أغاني بتعبر عن مواقفه وآراءه تجاه الوضع الحالي. مرسيل خلال زيارات للثورة، اعطى روح حلوة من خلال مشاركته الغناء مع ولاد وطنه.

كارمن لبس

ما منقدر الّا ما نحترم هالممثلة القديرة بأدوارها التمثيلية، كمان ما منقدر الّا ما نحترم تواجدها بالانتفاضة الشعبية وبكلمتها المؤثرة وقت ما قالت “يأسانة بس نزلت ما تركت لبنان لحظة، بس اتدمرت”.