جربوا باستا بتشق القلب من هل-٦ مطاعم حول لبنان

عبالكن صحن باستا معرّم ومغمور بالكريمة؟ لكل محبي الأكل الإيطالي وخص نص الباستا، شوفوا معنا 6 مطارح حول لتجربوا أطيب صحن باستا.

1- ماريولينو – البترون

بتفوح منو ريحة الباستا والبيتزا الشهية، بتقعدوا تحت الشجر والأضوية الساحرة وبتنبسطوا بأطيب أطباق الباستا الكريمي وعلى أنواعها!

الرقم: 555 766 76

2- بافاغلينو – الأشرفية

هالمطعم الإيطالي على درج مار نقولا رح يسحركن بالأضوية الخافتة والقعدة الرومانسية، بياخدكن على روما بالشرشف الأبيض والأحمر وصحون الباستا المعمولة بخلطة أعشاب مميزة على الآخر!

الرقم: 080 091 81

3- ماريو إي ماريو – الأشرفية

ماريو إي ماريو عندو قعدة تراس بتاخد العقل أد ما حلوة، بيقدم أطيب أنواع الباستا الإيطالية، وبيعملها على أصولها من أشهى المكونات!

الرقم: 036 888 76

4- أبيتيتو – كافة الفروع

بتلاقوا عند أبيتيتو الباستا معمولة متل بإيطاليا، بيعتمد الوصفة التقليدية وبيقدم صوصات كلاسيكية بتناسب كل الأذواق، السباغيتي بولونياز، والمعكرونة مع صلصة البيستو المحبوبة وقصص كتير طيبة. بتلاقوا هالمطعم بالجميزة، والحازمية، والحمرا، وبرمانا، وكمان البترون.

الرقم: 249 299 03

5- مطعم زهرتوني – القبيات

هالمطعم مخبى بضيعة القبيات وبيحكي قصة حب بين الشبف طوني زهر والباستا الإيطالية، بيعمل الباستا على الإيد، بخلطتو السرية ولمساتو الخاصة اللي بتميزو عن غيرو، ضروري تجربوا لما تطلعوا على القبيات!

الرقم: 844 469 81

6- شيف باستا – طرابلس

بيجمع بين أكل الشارع الإيطالي والأكل الشعبي اللبناني، بيتميز بتقديم باستا بطعمات غريبة عجيبة مع جبنة بتمغط مغط، الصحن معرّم وشكلو بيشق القلب!

الرقم: 083 499 70

شوفوا كمان، لقينا ٦ مطاعم بأنفه مع منظر بطير العقل.