مشوار على أجمل مطاعم البترون على البحر

من بعد ما رحنا مشوار على أجمل مطاعم جبيل على البحر، اليوم منطلع صوب البترون لنلمس السحر لي مخبايتلنا يا هل مدينة العريقة.

من ريحة البحر، للسور الفينيقي والكنايس الأثرية والآثار العريقة والورود والشوارع الملونة، لليوموناضة والناس الطيبة، المأكولات البحرية والموسيقى الجذابة… يعني لو جمعنا كل كلام الشعر ما رح نقدر نوصف جمال هل مدينة الساحرة.

البترون عندها محل بقلب كل لبناني أصيل، اليوم لنعمق علاقتنا بهل جزء المميز من بلدنا رح نروح مشوار على أجمل مطاعم البترون القاعدة على البحر.

١. المندلون

إنتو وعم تمشوا على شط البحصة وتغطسوا إجريكن بالرمل، رح يجذبكن هل مطعم القاعد على البحر. الأكل عندو غير شكل، والفيو متل الأفلام رح يخليكن تسرحوا بأفكاركن. الأكل عبارة عن اختبار لا يكرر مع كل الأجواء اللطيفة لي رح تمنحكن شعور غريب ما بتحسوا وين ما كان.

الرقم: 407 070 70

٢. لو ماران Le Marin

هل محل متخصص بالمطبخ اللبناني التقليدي، والقعدة عندو كمان على البحر. هل مطعم واسع وشرح، الخدمة الممتازة والأكل الطيب والكرم موجودين هون والقعدة على التراس والبحر تحتكن رح تاخدكن على عالم تاني.

الرقم: 016 744 06

٣. مرشاق على البحر

من أجمل المطاعم لي عم تسبح على المي، هون بتشموا ريحة البحر وبتشوفوا المغيب من بعيد. الأكل عندو غير شكل، وخاصةً أطباق ثمار البحر يلي لو بتبرموا لبنان كلو ما رح تلاقوا أطيب منا.

الرقم: 888 848 76

٤. رايز RAY’s

بهل محل رح تعيشوا جو البترون على الآخر، تمشوا على البحر إنتو وطالعين من الشوارع العتيقة وكفو طلوع، رح تلاقوا أجمل مكان لتقضوا في لحظات بترونية من العمر. رايز بقدم ترويقة بلدية من العمر… استمتعوا بأوقات ما بتتكرر وأطباق جذابة. الطاولات والكراسي بيطغي علين لون الأزرق والأبيض متل شي بيت يوناني عتيق.

الرقم: 703 919 03

٥. ستيفانو ديل مار San Stephano del Mar

حضروا حالكن لتعيشوا مغامرة فريدة من نوعها بقلب البترون، على المينا وحد الشخاطير ناطركن هل مطعم الونس لينقلكن بأجوائو الرومانسية على شي جيزرة بعيدة. غمضوا عيونكن وتسمعوا على صوت البحر وطلعوا مشاعركن الدفينة. هون الأكل رح يجذبكن من أول كدشة، مأكولات بحرية على أنواعها ومشروبات لذيذة بإنتظاركن، ما إلكن غير تجوا مع الناس لي بتحبوها لتعملوا ذكريات ما بتموت.

الرقم: 323 131 03

٦. أليكو فينيقيا Alec.Ô Feniqian Island

هل مطعم بعانق البحر الأزرق من كل الميلات، بس توصلوا رح تحسوا حالكن عم تفوتوا على شي مغارة مخباية بقلب البحر. هون رح ترجعوا تحسوا بالجينات الفينيقيي لي لإلكن من ورا الأكل وطريقة تقديم الأكل والبحر والسمك وكل شي… فيكن تطلبوا أطيب المأكولات البحرية وأطباق المازة اللبنانية على صوت وائل كفوري. فيكن كمان تقعدوا برا والبحر كلو قادمكن، بتحسوا حالكن قاعدين بقلب كرسي بنص البحر وعطول مع الأكل بقدمولكن صاج زغير لتعملوا مناقيش زغار على إيديكن وتستمتعوا بكل شي وتعيشوا كل حواسكن.

الرقم: 444 340 70

٧. بوتريز سي لاونج Botrys Sea Lounge

منكفي صوب كفرعبيدا ومننهي مشوارنا عند هل محل لي بعد مش الكل مكتشف جمالو المخبى. قاعد على البحر وبقدم أطيب المأكولات البحرية، بتسمعوا صوت الموج إنتو وعم تاخدوا أجمل الصور وتستمتعوا بأحلى الأوقات والنغمات. هل محل كتير exotic يعني بتلاقوا عندو أعشاب مدندلة مع قعدة قش وورود وين ما كان وأضوية خافتة لتصير قعدتكن أجمل ما يكون.

الرقم: 440 003 03

يلا على البترون!