خلونا نتذكر أشهر أغاني الأفلام اللبنانية

الموضوع اللي رح نكتب عنو اليوم بشيل الهم عن القلب وبخلينا نتذكر أجمل الإيام الدهبية للسينما اللبنانية. مين فينا ما بيتذكر فيلم غنوجة بيا وأفلام زياد برجي الكوميدية وفيلم حلوة وكذابة وغيرن كتير من الأفلام الكوميدية والدرامية. رح نتذكر اليوم سوا أبرز أغاني الأفلام اللبنانية المشهورة اللي انعرضت بصالات السينما.

١. حبة كراميل

هالغنية بصوت نوال الزغبي كانت غنية المسلسل لي تكمل عرضو بصالات السينما وحقق نجاحات كبيرة وهوي بيحكي عن قصة “مايا” لي بتقرر تاخد حبة كراميل بتخليها تصير تعرف شو عم بدور براس الرجال.

٢. حلوة كتير وكذابة

من أجمل المسلسلات اللي انعرضت على الشاشة اللبنانية وصالات السينما، وهوي عبارة عن فيلم رومانسي بطابع كوميدي مهضوم بيحكي عن قصة حب بتجمع بين “داليدا” و”رمزي” الفنان المشهور، ومن أكتر الأغاني لي انشهرت بالفيلم هوي الديو لي جمع زياد برجي وداليدا خليل “ما بق تقلي إعشقها”.

٣. سكر بنات

من أشهر الأفلام لنادين لبكي على الإطلاق، انشهر بلبنان وبالعالم بسبب تناولو مواضيع حساسة بالمجتمع اللبناني لأول مرة بطريقة واضحة وصريحة، ومن الفيلم كلنا منتذكر غنية “مرايتي” بصوت رشا رزق العذب.

٤. بالغلط

فيلم كوميدي رومانسي ببطولة زياد برجي ودانا حلبي وساندي حكيم وعباس جعفر .بيحكي عن قصة حب بتولد بالصدفة بين رئيس عصابة ومهندسة. هل فيلم انعرف بغنيتين “وين بدك تروح” و”شو حلو” لي كسرت الأرض وصارت أشهر غنية لزياد بوقتها.

٥. أهلا بك في لبنان

هل فيلم كمان بطولة زياد برجي، وسام صباغ، فيفيان أنطونيوس وكارلا بطرس ونخبة من ألمع نجوم الشاشة اللبنانية، بيحكي عن قصة عيلة لبنانية قررت ترجع على لبنان من أميركا بعد غيبة سنين وهيك بتولد قصة حب بين شب لبناني عايش كل حياتو بلبنان وبنت لبنانية أول مرة بتزور لبنان. أما غنية الفيلم فهيي “حلياني” لي حققت نجاحات كبيرة وصارت هيت على الراديو وبالسهرات، و من أشهر الأغاني بوقتها.

٦. غنوجة بيا

شو كنا ننطر هل مسلسل مناطرة كل نهار أربعا بعد الأخبار، وبس نزل الفيلم تبعو على السينما كلنا منتذكر كيف كسر الأرض بوقتها والناس كلها نزلت تحضر الفيلم قد ما كانت قصتو مشوقة وبضحك وبتشيل الهم عن القلب. وأكيد بتتذكروا غنية رنا بركات الشهيرة بالفيلم “أنا غنوجة وأمورة بقولوا عني مغرورة… طيب مغرورة ليش لاء أنا لي ما بينقلي لاء.”

خبرونا بالتعليقات، شو كمان حبيتوا وحافظين من أغاني الأفلام اللبنانية؟

شوفوا كمان، أضرب ١٢ شغلة كانوا يصيروا معنا إيام المدرسة.