صار فيكن تحسوا بجو كريسماس عند هال ٥ محلات!

قرب عيد الميلاد وأكيد صار عبالكن تحسوا بأجواء العيد وفرحة العيد من هلق. شوفوا معنا هالكم محل يلي بلشوا يحسسونا بجو العيد عبكير.

١. يونيكورن كافي Unicorn Coffee House، برمانا

بيشبه قعدة بيت بنيو يورك سيتي، مزين بشجرة الميلاد والأضوية وكل ألوان العيد وفوقن شرشف زغير لتحطوا عليكن إذا بردتوا. بتطلبوا أطيب هوت تشوكولات مع بسكويت وقطعة حلو وبتعيشوا كنكنة العيد على الآخر كأنكن بشي فيلم هوليوود.

الرقم: 966 822 71

، بعبدات٢. تشانكي مانكي Chunky Monkey

المطعم صار مزين بزينة العيد من برا ومن جوا، والحلو إنو بتجوا مش بس لتاكلوا بس كمان لتقعدوا حد النار وتعيشوا أجواء الكنكنة والدفا. بقدملكن كل الأكلات الطيبة، الحلويات والمخبورات لي بيتفنن فيها مع أطيب كاس نبيد.

الرقم: 504 714 04

٣. قرية المغتربين Lebanese Diaspora Village، البترون

تزينت هل قرية بألوان الميلاد وبالشجر وبالفرح وكل المطاعم المجاورة هونيك رح تلاقوا فيها أجواء العيد ناطرتكن. وقريباً رح ينفتح معرض للميلاد مع أجمل زينة وأغاني ميلادية وجو حلو.

الرقم: 631 634 03

٤. مطعم لوريس، الجميزة

حطوا الشجرة والأضوية وكل زينة كريسماس وناطرينكن تعيشوا فرحة العيد. عندن أكل لبناني وقعدة لطيفة مرتبة، بتستأنسوا بأطيب أكل بين شجرات الزيتون الزغار وبجو مليان دفا.

الرقم: 568 567 01

٥. أنا بيروت، أنطلياس

نزلوا زينة الميلاد وحطوا الشجرة وأغاني العيد لي صارت ترافقن بكل قعداتكن. إذا عبالكن قعدة لذيذة مهضومة مع أصحابكن وتاكلوا مأكولات لبنانية وعالمية وحلو، هل مطعم هوي عبارة عن جنة بتقدم جميع أصناف وصحون الترويقة والمازة اللبنانية وعندو كمان مأكولات عالمية متل البرغر والبيتزا وحلويات على أنواعها. كل شي محضر طازة وبيصول ع طاولتكن مع شوية فن وكرم.

الرقم: 733 888 70

شوفوا كمان، جولة سياحية بقلب شكا القديمة: ١٢ شغلة مهضومة فيكن تعملوها.