٩ مطاعم شتوية بقعدة كهف بلبنان

بهيدا الطقس البارد ومع التلجة الأخيرة، أحلى قعدة بتكون بقلب الكهف حد النار مع كاس نبيذ، لهيك قررنا نجمعلكن المطاعم الشتوية لي عندها قعدة كهف. فهل ويك-أند بدل ما يكون عندكن مشاريع بتزهق، نقوا واحد من هالمطاعم تروحوا علين.

١. لي كاف دو فقرا Les Caves de Chez Michel، فقرا

هالمطعم عبارة عن كاف مخبى بالجبل ومغطى بالتلج الأبيض، أول ما تفوتوا رح تنبهروا بالشموع والأضوية الخفيفة والشيميني. بقدم العديد من الأطباق الشتوية منا فوندو الجبنة الدايبة والستيك والسلطات المتنوعة والبطاطا المشوية وأكيد المشروبات والحلويات. مش بس هيك، هالمطعم قريب على بيستات التلج بالمنطقة فتبقضوا نهار على التلج وبترجعوا بتاكلوا لقمة.

الرقم: 418 894 03

٢. فلينت Flint، ضهر الصوان

مطعم قاعد بقلب كهف وعندو قعدة رومانسية وشموع وجو رومانسي مع أضوية خافتة، بقدم مجموعة من الأطباق المميزة منا الستيك والبيتزا مع بار خاص بالمشروب وقعدة حد النار مع موسيقى رومانسية.

الرقم: 375 864 71

٣. لو غارغوتيي Le Gargotiers، برمانا

مطعم جبلي ساحر مثالي لتقضوا فيه أمسية دافية وتستمتعوا بقعدة على الشيميني مع ألذ الأطباق الفرنسية الأصيلة والشهية. بتبحوا الإسكالوب؟ هون في! وبتحبوا البزاق مع صوص؟ كمان موجود!

الرقم: 562 960 04

٤. لي كاف روم Les Caves Roum، جزين

طلعوا عجزين ع لي كاف روم وبتلاقوا حالكن قاعدين جوات كهف حجر شيك، عم تاكلوا سفرة لبنانية وعالمية مميزة. الحبيبين رح يمبسطوا بهالقعدة الرومانسية والجو المليان حب ورواق ودفا.

الرقم: 292 810 07

٥. قرطبة qortoba، بعبدات

هون القعدة جوات كهف حجر، بس هالمرة مع أكل شرقي ورومانسية كتير. قعدة شتوية حقيقية على البيانو مع شيميني وورد بكل مطرح.

الرقم: 705 614 71

٦. بيتنا، الباروك

هالمطعم بقعدتو الشتوية رح ياخدكن على عالم تاني، قعدة كهف حجر وأطباق المطبخ اللبناني على أنواعها. بتجوا على معدة فاضية وبتاكلوا أطيب الأكلات إنتو ومدفايين ومبسوطين وعم تستمتعوا بكل لحظة.

الرقم: 540 240 25

٧. تلايا عالبير، دوما

بقلب هالمطعم بتحسوا حالكن قاعدين بكاف وبياخدكن رحلة من خلال الأطباق الطيبة لي بيعملوها من حواضر الضيعة والحلو المحضر بشغف لتحسوا حالكن قاعدين بالبيت ع دفا الشتا وريحة الأكل البلدي. منظر خيالي… حجر أسود وتلج أبيض!

الرقم: 896 345 03

٨. تشيريلاين Cherrylane، حمانا

مطعم مهضوم مكنكن مخبى بالضيعة عم بقدملكن أكل طلياني وفرنساوي كتير مميز مع جو رومانسي ساحر. القعدة هون كمان جوات كهف حجر وبتدفي القلب بالشتوية وبتستحلوا عندن طبق الفوندو وكاس النبيد بهيك جو مع أغاني رومانسية. إسمو “طريق الكرز” لأن مستوحى من الكرز يلي مشهورة في حمانا ومن هون إجا إسم المحل يلي بقدم كتير أطباق فيها كرز.

الرقم: 588 335 71

٩. مطعم الصخرة، شملان

فتشوا على القصر القرميد الحلو بضيعة شملان، هونيك رح تستقبلكن ريحة الفخار يلي بتشق القلب، وأكيد كيف ما بتبرموا بتحسوا حالكن قاعدين بكهف. بيتميز هالمطعم بقعدتو التراثية وأكلو الإستثنائي والجو الشتوي الدافي.

الرقم: 763 233 03

شوفوا كمان، ٩ أوتيلات ومنتجعات مكللة بالتلج بلبنان!