بعد الجدل الكبير مع دكتور فود، كاتريكسا نزلت بسكويت جديد

بعالم التيكتوك الغريب العجيب، في حدا كلنا اشغلنا بقصتو من جمعتين: دكتور فود، أو صانع المحتوى جورج ديب، يلي نزلت مرتو شروق (سانشاين) التيكتوكر المعروفة فيديو لايف عم تفضح خيانته لإلها قدام كل المشاهدين مع التيكتوكر كاتريكسا. وقامت الدنيا وما قعدت من بعد هالخبر وصارت كل وسايل التواصل الاجتماعي بسيرتن.

ومن بعد الإتهامات والجدل الكبير، ورغم كل المشاكل، قررت كاتريكسا ترمي القنبلة المفاجأة للجمهور: نزلت ماركة بسكويت خاصة فيها تحت إسم “كاتريكسا“!

صح متل ما سمعتوا، كاتريكسا صار عندها بسكويت! وكيف شكلو؟ لونو زهر بيشبه كتير الأوريو وبيجي على تلات طعمات: كريمة الشوكولا، كريمة الفريز، وكريمة الفانيليا، وأهم شي بالموضوع كلو إنو مطبوع على علبة البسكويت صورتها. رح توصل هالبسكويتات للسوق اللبناني قريباً.

ولكلنا عم تسألو لحالنا هلق: قولكن معقول يكون يلي صار من جمعتين مسرحية بس للتسويق لهالبسكويت الجديد؟ معقول نكون وصلنا لهالدرجة من الإنحطاط؟ مع كل شي عم بصير بطلنا نستغرب شي صراحة… إنتو شو رأيكن؟

غير هيك، در فورد ومرتو شروق سانشاين، يلي تصدروا وسائل التواصل الإجتماعي الأسبوعين الأخيرين بسبب الفضيحة، ويلي معروفين بترويجن لمنتج “Dr Food” رجعوا كشفوا عن نوع جديد من البسكويت نازل على السوق ولي بيحمل إسم “Dr. Food Signature collection“. يعني شو هال resistance وشو هالسرعة بالتريوج؟ شو هالخلاف لي نحل بأقل من أسبوعين!

بعصر السوشل ميديا الحديث وبعصر التيكتوك، صار كل شي ممنوع مسموح، وبطلنا نستغرب بس نشوف العالم عم تبيع سمعتها وصيتها كرمال شوية فيوز وأرباح مادية. بس هل يا ترى مين المستفيد؟

لتعرفوا أكتر عن خبرية خيانة در فود لمرتو قروا هالمقال!