حديقة تحت الميّ بنص بحر صيدا، شوفوا هون!

من نص البحر بمدينة صيدا بتلاقوا حديقة بحرية تحت الميّ! مشوار ب ٣ دقايق بقارب بياخدكن من شط صيدا وبيوصلكن ع جزيرة زيرة الشهيرة بالجنوب.

لمحة عن جزيرة زيرة الصيداوية:

 لما توصلوا ع جزيرة زيرة بتلاقوا حالكن ع شط صخري بنص البحر، بقلبو ميّ مشهورة أديه صافية ونضيفة كتير! أهل المنطقة عملوا خيم قش ع الشط لتقدر الناس تروح ع الجزيرة وتقضي النهار هونيك. بقلبو كمان منارة تاريخية، وحتى أثار فينيقية قديمة غرقت ب ٦٤٧ ق.م. وتم إكتشافها حول الجزيرة سنة ١٩٩٧. يعتبر من أجمل المناطق السياحية والمواقع البحرية بصيدا وبلبنان كلو! 

طيب، شو خبرية الحديقة البحرية؟ 

بتلاقوا حديقة صيدا المائية تحت سطح البحر، وجنب جزيرة زيرة وانتو بتقدروا تزوروها من هونيك. وتعتبر هالحديقة أكبر حديقة مائية بلبنان. بتمتد حديقة صيدا المائية ع كذا منطقة محاوطة لجزيرة زيرة، بعمق بين ١٠ أمتار لحد ٣٠ متر. وفيها جور رملية، صخور ضخمة، وتنوع بيولوجي استثنائي من السلاحف والإسفنج والطحالب البحرية والمرجان الناعم. 

اشتغل الجيش اللبناني مع السلطات المحلية ع إغراق دبابات وآليات عسكرية قبل كم سنة بهالحديقة، والهدف منها إغناء وتنويع الثروة السمكية ببحر صيدا، خصوصي انو السمك بيعمل منها بيوت، وبيقدر العشب البحري ينمو ع الحديد تبعها ويتنوع.  

شوفوا تنوع الثروة السمكية هون:

تعتبر موقع مميز بتجذب السياح من كل أنحاء العالم، ومقصد حلو لكل محبي البحر وهواة الغطس المبتدئين والمحترفين! 

خبرونا، حبيتوا هالجوهرة المخفية؟ وهل رح تزوروا حديقة صيدا المائية هالصيف؟

شوفوا كمان، نازلين ع لبنان هالصيف؟ شوفوا أحلى ١٥ مشوار فيكن تجربوهن