لأول مرة: إيلي صعب يجمع نجوم هوليوود والعالم العربي بحفل أسطوري

إيلي صعب طل علينا مبارح بحفل إستثنائي، وهو واحد من أبرز الشخصيات اللبنانية يلي حملو إسم لبنان للعالم ومنفتخر فيهن. إيلي صعب، المصمم اللبناني العالمي، جمع ولأول مرة بالتاريخ نخبة من النجوم العرب والأجانب بحفل أسطوري بالرياض، تحت عنوان “1001 موسم من إيلي صعب“، ليحتفلوا بمسيرتو اللي امتدت على 45 سنة. هالحدث كان أكتر من عرض أزياء، كان ليلة من ليالي ألف ليلة وليلة!

مسيرة فخر من لبنان للعالم

من ضواحي لبنان وصولاً للعالمية، قدر إيلي صعب يرسم إسمو بحروف من دهب بعالم الموضة. من صغرو كان عندو شغف بالخياطة، وبلش يصمم فساتين لأهلو وجيرانو. ولما كبر، صار عندو إمبراطورية عالمية ومحبين من كل أنحاء العالم. وصار يعتبر رمز من رموز الفخر اللبناني، وبيحمل إسمو وين ما راح. اليوم لبنان عم يمر بأيام عصيبة، وإيلي ما نسي بلدو، و تمنى للبنان الأمان وأيام أفضل خلال الحفل.

أشهر نجوم العالم بسهرة أسطورية بالرياض

ليلة مبارح، كانت الرياض على موعد مع سهرة خيالية، عرض إيلي صعب جمع في نجوم من هوليوود والعالم العربي. جينيفر لوبيز وكاميلا كابيو اللي غنت عالهوا، ووجهت تحية بالعربي بقولها: “مرحباً الرياض”، وغيرن كتير حضروا ليساندوا مصممنا الحبيب، وليحتفلوا بإنجازاته.

السجادة الحمراء

الحدث حضرو أشهر نجوم العالم. من النجوم العالميين اللي حضروا جنفير لوبيز، سيلين ديون، مونيكا بيلوتشي، وهالي بيري اللي أضافوا سحر هوليوود للسجادة الحمراء. النجوم العرب ولبنان حضروا كمان، متل يسرا، إليسا، نادين نجيم، سيرين عبد النور، ونانسي عجرم. السهرة كانت كأنها خليط من عالمين، العربي والغربي، وكأن إيلي صعب حب يجمع العالم كلو تحت سقف واحد.

الحفل ما كان بس عن الأزياء، بل تحول لعروض فنية وموسيقية حيّة. من ضمن الليلة الخيالية، شفنا عروض مميزة قدمها أهم وأشهر نجوم العالم وسط أجواء فخمة وديكورات مستوحاة من أساطير ألف ليلة وليلة.

من بيروت لهوليوود، إيلي صعب صنع إسمو كأيقونة عالمية، والليلة كانت مليانة بالفخر لكل لبناني.

شوفوا كمان، حكايتين من القلب… هدى شديد وربى حبشي بوج السرطان